Pune News : वादळी पावसाने उघडीप देताच, राज्यात उन्हाचा चटका वाढला आहे. विदर्भ, मध्य महाराष्ट्रात होरपळ वाढली आहे. आज (ता. ३) कोकणात उष्ण व दमट हवामानाचा अंदाज असून, तुरळक ठिकाणी उष्ण लाटेचा इशारा (येलो अलर्ट) देण्यात आला आहे. उर्वरित राज्यात उन्हाची ताप कायम राहण्याची शक्यता हवामान विभागाने वर्तविली आहे.

दक्षिण छत्तीसगडपासून दक्षिण तमिळनाडूपर्यंत हवेचा कमी दाबाचा पट्टा कायम आहे. राज्यात आकाश निरभ्र होत झाल्याने स्वच्छ सूर्यप्रकाश जमिनीवर येत आहे. गुरुवारी (ता. २) सकाळपर्यंतच्या २४ तासांमध्ये अकोला येथे राज्याचे हंगामातील उच्चांकी ४३.१ अंश सेल्सिअस तापमानाची नोंद झाली. मालेगाव येथे ४३ अंश तापमान नोंदले गेले.

दरम्यान उन्हाचा चटका कायम असल्याने चंद्रपूर, सोलापूर, गडचिरोली, ब्रह्मपुरी, वर्धा येथे ४२ अंश, तर विदर्भ, मध्य महाराष्ट्रात अनेक ठिकाणी तापमान चाळिशीपार आहे. आज (ता. ३) कोकणात तुरळक ठिकाणी उष्ण लाटेचा तसेच उष्ण व दमट हवामानाचा इशारा देण्यात आला आहे. उर्वरित राज्यात उन्हाचा चटका, उकाडा कायम राहण्याची शक्यता आहे.

गुरुवारी (ता. २) सकाळपर्यंतच्या २४ तासांमध्ये नोंदले गेलेले कमाल तापमान (अंश सेल्सिअसमध्ये) :

पुणे ३८.९, धुळे ४१, जळगाव ४१.७, कोल्हापूर ३७.२, महाबळेश्‍वर ३२.१, मालेगाव ४३, नाशिक ३७.१, निफाड ३७.६, सांगली ३९.६, सातारा ३८.४, सोलापूर ४२.६, सांताक्रूझ ३४.२, डहाणू ३५, रत्नागिरी ३३.७,

छत्रपती संभाजीनगर ४०.८, बीड ४०.९, नांदेड ४१.६, धाराशिव ४०.४, परभणी ४१, अकोला ४३.१, अमरावती ४१.८, बुलडाणा ३८.६, ब्रह्मपुरी ४२.३, चंद्रपूर ४२.८, गडचिरोली ४२.६, गोंदिया ३८.९, नागपूर ४०.८, वर्धा ४२.०, वाशीम ४१.८, यवतमाळ ४०.

उष्ण लाट, उष्ण व दमट हवामानाचा इशारा (येलो अलर्ट) :

ठाणे, रायगड, सिंधुदुर्ग, सोलापूर.

४२ अंशांपेक्षा अधिक कमाल तापमान असलेली ठिकाणे :

अकोला ४३.१, मालेगाव ४३, चंद्रपूर ४२.८, सोलापूर ४२.६, गडचिरोली ४२.६, ब्रह्मपुरी ४२.३, वर्धा ४२.