Pune News : सूर्य पुन्हा तळपू लागल्याने राज्यात उन्हाचा चटका वाढू लागला आहे. अनेक ठिकाणी कमाल तापमान ३७ अंशांच्या पार गेले आहे. दोन दिवसांत राज्याच्या कमाल तापमानात २ ते ४ अंशांची वाढ होण्याची शक्यता आहे. आज (ता. २३) राज्यात उन्हाच्या झळा, उकाडा वाढण्याची शक्यता हवामान विभागाने वर्तविली आहे.

वायव्य राजस्थान आणि परिसरावर समुद्र सपाटीपासून १.५ किलोमीटर उंचीवर चक्राकार वाऱ्यांची स्थिती आहे. पश्‍चिम विदर्भापासून उत्तर तमिळनाडूपर्यंत हवेचा कमी दाबाचा पट्टा सक्रिय आहे. राज्यात अंशतः ढगाळ हवामान होत असून, उकाड्यात वाढ झाल्याने घामाच्या धारा वाहू लागल्या आहेत.

शुक्रवारी (ता. २२) सकाळपर्यंतच्या २४ तासांत सांताक्रूझ येथे राज्यातील उच्चांकी ३८.८ अंश सेल्सिअस तापमानाची नोंद झाली. राज्यात बहुतांश ठिकाणी कमाल तापमानाचा ३६ अंशांच्या पुढेच असल्याने दुपारच्या वेळी घराबाहेर पडणे तापदायक ठरू लागले आहे. राज्याच्या कमाल तापमानात आणखी वाढ होत पारा चाळिशीपार जाण्याचे संकेत आहेत.

शुक्रवारी (ता. २२) सकाळपर्यंतच्या २४ तासांमध्ये नोंदले गेलेले कमाल तापमान (अंश सेल्सिअसमध्ये) :

पुणे ३७.२, नगर ३५.८, धुळे ३८.०, जळगाव ३७.६, कोल्हापूर ३६.८, महाबळेश्वर ३१.४, नाशिक ३६.३, निफाड ३५.०, सांगली ३६.३, सातारा ३६.०, सोलापूर ३७.४, सांताक्रूझ ३८.८, डहाणू ३५.६, रत्नागिरी ३५.०,

छत्रपती संभाजीनगर ३५.५, नांदेड ३६.८, परभणी ३७.१, अकोला ३८.०, अमरावती ३६.०, बुलडाणा ३५.५, ब्रह्मपुरी ३६.२, चंद्रपूर ३६.४, गडचिरोली ३४.६, गोंदिया ३३.८, नागपूर ३५.०, वर्धा ३६.१, वाशीम ३८.४, यवतमाळ ३८.०.