Pune News : राज्यात तुरळक ठिकाणी हलक्या पावसाच्या सरींनी हजेरी लावली आहे. अनेक ठिकाणी सकाळपासूनच ढगाळ आकाश असून, किमान तापमानात वाढ होत थंडी गायब झाली आहे. आज (ता. २८) राज्यात वादळी वारे, विजांसह पावसाची शक्यता असल्याने दक्षतेचा इशारा (ऑरेंज अलर्ट) हवामान विभागाने दिला आहे.

दक्षिण केरळ लगतच्या अरबी समुद्रात समुद्र सपाटीपासून ३.१ किलोमीटर उंचीपर्यंत चक्राकार वाऱ्यांची स्थिती सक्रिय आहे. उत्तर भारतातील राज्यांमध्ये थंडीचा कडाका कमी-अधिक होत आहे. शुक्रवारी (ता. २७) राजस्थानच्या ‘चुरू’ येथे देशाच्या सपाट भूभागावरील नीचांकी ५.४ अंश सेल्सिअस तापमानाची नोंद झाली. राज्यातही थंडी गायब झाली असून, शुक्रवारी (ता. २७) धुळे येथील कृषी महाविद्यालयात राज्याचे नीचांकी १३.५ अंश तापमान नोंदले गेले.

राज्यात पावसाला पोषक हवामान झाले असतानाच, पहाटेच्या वेळी दाट धुके पाहायला मिळत आहे. धाराशिव, नांदेड, छत्रपती संभाजीनगर, अकोला जिल्ह्यांसह राज्यात तुरळक ठिकाणी हलक्या पावसाने हजेरी लावली आहे. आज (ता. २८) मध्य महाराष्ट्र, मराठवाडा, विदर्भात विजांसह वादळी पावसाची शक्यता असल्याने दक्षतेचा (येलो अलर्ट) हवामान विभागाने दिला आहे.

शुक्रवारी (ता. २७) सकाळी ८.३० वाजेपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे २८.६ (१६.४), अहिल्यानगर २८.२ (१८.६), धुळे ३० (१३.५), जळगाव ३०.३ (१९.१), जेऊर २९.५ (१९), कोल्हापूर २८.५ (२१), महाबळेश्‍वर २४.७ (१६.१), मालेगाव २८.२ (१८.४), नाशिक २९ (१६.५), निफाड २५.५ (१७.२), सांगली २८.४ (२१), सातारा ३०.२ (१९.५), सोलापूर ३१.८ (२१.१), सांताक्रूझ ३०.५ (१८.५),

डहाणू २७.९ (१८.३), रत्नागिरी ३०.८ (२१.७), छत्रपती संभाजीनगर २७.२ (१९.६), धाराशिव २९.१ (१८.४), परभणी २९.४ (२१.५), परभणी कृषी विद्यापीठ २८.१ (२०.९), अकोला ३१.६ (२०.१), अमरावती ३१.२ (२०.३), भंडारा २९.८ (१६.८), बुलडाणा ३० (१९.६), ब्रह्मपुरी ३३ (१८.८), चंद्रपूर २९ (-), गडचिरोली २८.२ (१८.८), गोंदिया २९.५ (१७), नागपूर ३०.३ (१९.२), वर्धा ३० (१८.९), वाशीम ३०.६ (२०.२), यवतमाळ २९.५ (-).

वादळी पावसाचा इशारा (येलो अलर्ट) :
जळगाव, अहिल्यानगर, छत्रपती संभाजीनगर, जालना, बीड, अमरावती, नागपूर, बुलडाणा, गडचिरोली, गोंदिया, चंद्रपूर.