Pune News: कोकण, घाटमाथा आणि विदर्भात जोरदार पावसाने हजेरी लावली आहे. आज (ता. २८) पुणे आणि सातारा जिल्ह्यांच्या घाटमाथ्यावर जोरदार पावसाची शक्यता असल्याने दक्षतेचा इशारा (ऑरेंज अलर्ट) आहे. उर्वरित कोकणासह विदर्भात जोरदार सरींची शक्यता असल्याने सतर्कतेचा इशारा (येलो अलर्ट) हवामान विभागाने दिला आहे.

शुक्रवारी (ता. २७) सकाळपर्यंतच्या २४ तासांमध्ये जेऊर येथे राज्यातील उच्चांकी ३२.५ अंश तापमानाची नोंद झाली. कोकण, घाटमाथ्यासह विदर्भात पावसाचा जोर कायम होता. घाटमाथ्यावरील शिरगाव येथे १६० मिलिमीटर, आंबोणे येथे १५० तर दावडी येथे १३० मिलिमीटर पावसाची नोंद झाली. तर विदर्भात वाशीममधील मंगरूळपीर, बुलडाण्यातील मेहकर येथे प्रत्येकी १३० मिलिमीटर पावसाची नोंद झाली. तर लोणार येथे १०० मिलिमीटर पाऊस पडला.

आज (ता. २८) पुणे आणि साताऱ्याच्या घाटमाथ्यावर जोरदार सरींची शक्यता असल्याने दक्षतेचा इशारा (ऑरेंज अलर्ट) आहे. पालघर, ठाणे, मुंबई, रायगड, रत्नागिरी, सिंधुदुर्ग, कोल्हापूरच्या घाटमाथ्यावर जोरदार पावसाचा अंदाज असल्याने, तसेच विदर्भात विजांसह पावसाची शक्यता असल्याने सतर्कतेचा इशारा (येलो अलर्ट) देण्यात आला आहे. उर्वरित राज्यात हलक्या पावसाची शक्यता हवामान विभागाने वर्तविली आहे.

मॉन्सून दोन दिवसात देश व्यापणार

नैॡत्य मोसमी वाऱ्यांनी (मॉन्सून) गुरुवारी (ता. २६) राजस्थान, हरियाना, पंजाबच्या आणखी काही भागात प्रगती केली. जैसलमेर, बिकानेर, भारतपूर, रामपूर, सोनीपत, अनुपनगर पर्यंतच्या भागात मॉन्सून दाखल झाल्याने देशाच्या बहुतांश भागात पोचला आहे. शुक्रवारी (ता. २७) मॉन्सूनची चाल जैसे थे होती. मॉन्सूनच्या प्रगतीचा वेग पाहता दोन दिवसांत मॉन्सून संपूर्ण देश व्यापण्याची शक्यता असल्याचे हवामान विभागाने म्हटले आहे.

उपसागरात नव्याने कमी दाबाची शक्यता

पश्चिम बंगाल आणि परिसरावरील कमी दाबाचे क्षेत्र निवळून गेले आहे. तर उत्तर बंगालच्या उपसागरात वाहणाऱ्या चक्राकार वाऱ्यांमुळे आज (ता. २८) नव्याने कमी दाब क्षेत्राची निर्मिती होण्याचे संकेत आहेत. नैॡत्य राजस्थान आणि परिसरावर चक्राकार वाऱ्यांची स्थिती असून, त्यापासून बांगलादेशापर्यंत हवेचा कमी दाबाचा पट्टा विस्तारला आहे.

शुक्रवारी (ता. २७) सकाळी ८.३० वाजेपर्यंतच्या २४ तासांमध्ये नोंदले गेलेले तापमान (अंश सेल्सिअसमध्ये) :

‎ठिकाणे---तापमान कमाल---तापमान किमान

‎पुणे---२९.५---२३.०

अहिल्यानगर---२८.२---२२.७

धुळे---३१.०---२०.६

जळगाव---२७.३---२३.४

जेऊर---३२.५---२१.५

‎‎कोल्हापूर---२६.१---२२.१

‎महाबळेश्वर---१९.८---१८.२

मालेगाव---२८.८---२१.६

‎‎नाशिक---२७.४---२२.६

‎निफाड---२६.५---२२.९

‎सांगली---२७.८---२२.८

‎सातारा---२७.८---२२.६

‎सोलापूर---३१.१---२३.४

‎सांताक्रूझ---३०.७---२७.०

डहाणू---३१.८---२४.७

‎रत्नागिरी---२९.८---२४.६

‎छत्रपती संभाजीनगर---२६.३---२२.५

‎धाराशिव---३०.०---२२.०

‎परभणी---२६.४---२३.४

परभणी (कृषी)---२५.८---२२.७

‎‎अकोला---२६.८---२४.०

अमरावती---२६.४---२१.९

‎भंडारा---३०.०---२५.०‎‎

बुलडाणा---२४.४---२२.०

‎ब्रह्मपुरी---२९.८---२४.६

‎चंद्रपूर---३०.६---२४.०

‎गडचिरोली---२८.४---२४.०

‎गोंदिया---३१.२---२४.४

‎नागपूर---३०.३---२४.०

‎वर्धा---२६.५---२३.८

‎वाशीम---२४.०---२३.८

‎यवतमाळ---२४.०---२१.८

जोरदार पावसाचा इशारा (ऑरेंज अलर्ट) :

पुणे घाटमाथा, सातारा घाटमाथा.

जोरदार पावसाचा इशारा (येलो अलर्ट) :

पालघर, ठाणे, मुंबई, रायगड, रत्नागिरी, सिंधुदुर्ग, कोल्हापूर घाटमाथा.

विजांसह वादळी पावसाची शक्यता (येलो अलर्ट) :

बुलडाणा, अकोला, वाशीम, अमरावती, वर्धा, नागपूर, यवतमाळ, भंडारा, गोंदिया, चंद्रपूर, गडचिरोली.