Jalgaon News : खानदेशात पुन्हा एकदा बेमोसमी पाऊस आल्याने पीकहानी होत आहे. धुळ्यात काही भागात गारपीटदेखील झाली आहे. ऐन पीक कापणी, मळणीच्या काळात पाऊस आल्याने नुकसान होत आहे.

यापूर्वी ४ ते ७ मार्च व ९ ते १७ मार्च यादरम्यान अनेक भागात गारपीट, पाऊस झाला. तीन-चार वेळेस गारपीट पाऊस झाल्याने मका, गहू, सूर्यफूल आदी पिकांना फटका बसला. त्यात खानदेशात सुमारे ५६ हजार हेक्टरवरील पिकांचे नुकसान झाले.

एकट्या रावेर तालुक्यात सुमारे दोन कोटी रुपयांची पिकहानी त्या वेळेस झाली. आता या महिन्यातही पावसाने शेतकऱ्यांची चिंता वाढविली आहे.

केळी, पपई, कलिंगड, खरबूज काढणीवर आहेत. अनेक भागात काढणी सुरूदेखील आहे. तसेच काबुली हरभरा, दादर ज्वारी, मका आदी पिकांची मळणीदेखील सुरू आहे. परंतु वादळी पावसाने गुरुवारी (ता.६) अनेक भागात हजेरी लावल्याने ही कामे ठप्प झाली आहेत.

शुक्रवारीदेखील सकाळपासून ढगाळ व पावसाळी वातावरण होते. सुसाट वारा मध्येच येत होता. यामुळे केळीची पाने फाटण्याची समस्या खानदेशात तयार झाली आहे. पाने फाटल्यास पुढे झाड कमकुवत होते. घड हवा तसा येत नाही.

ज्वारी, मका मळणीच्या कामांनाही फटका बसला आहे. अनेक भागात कापणीचे काम बंद करण्यात आले. केळीची काढणीदेखील फक्त मुख्य मार्गालागतच शुक्रवारी सुरू होती. कारण अंतर्गत भागात पावसाने रस्ते खराब होऊन वाहतूक शक्य होत नाही. पपई काढणीदेखील रखडली. तसेच कलिंगड, खरबूज काढणीदेखील अनेकांनी पुढे ढकलली आहे.

या भागात पाऊस

गुरुवारी सायंकाळी धुळे, नंदुरबार जिल्ह्यात अनेक भागात मध्यम पाऊस व हलकी गारपीटदेखील झाली. धुळ्यातील पूर्व व मध्य भागात गारपीट, पाऊस झाला.

नंदुरबारातही नंदुरबार, शहादा, नवापूर भागात हलका पाऊस झाला. सुरवातीला सुसाट वारा व नंतर मध्यम, हलका पाऊस तसेच काही सेकंद हरभऱ्याच्या आकाराच्या गाराही पडल्या.