Pune News : काही ठिकाणी ढगाळ वातावरण आणि पावसाला पोषक वातावरण झाल्याने राज्यातील तापमानात चढ उतार सुरु आहेत. अनेक ठिकाणी पारा १० च्या दरम्यान दिसत असल्याने थंडीही जाणवत आहे. आज उत्तर महाराष्ट्र, उत्तर कोकण आणि मराठवाड्यात ढगाळ हवामानासह तुरळक ठिकाणी हलक्या पावसाची शक्यता हवामान विभागाने दिली आहे. तर दोन दिवसांत थंडी आणखी वाढेल, असाही अंदाज हवामान विभागने दिला.

राज्यातील तापमानात चढ उतार दिसून येत आहेत. आज ठाणे, धुळे, नंदूरबार, जळगाव, नाशिक, अहिल्यानगर, छत्रपती संभाजीनगर, जालना, परभणी आणि बीड जिल्ह्यात काही ठिकाणी ढगाळ वातावरणासह हलक्या पावसाचा अंदाज हवामान विभागाने दिला. तर उद्यापासून पावसाचे वातावरण निवळेल, असेही हवामान विभागाने स्पष्ट केले.

नैॡत्य बंगालच्या उपसागरामध्ये चक्राकार वाऱ्यांची स्थिती आहे. राजस्थान आणि परिसरावर चक्राकार वारे वाहत आहेत. यातच वायव्य भारतात पश्‍चिमेकडून जोरदार वारे वाहत असल्याने राज्यांमध्ये थंडीची तीव्र झाली आहे. अनेक राज्यात दाट धुक्याचे साम्राज्य दिसून येत आहे. आज देशातील सपाट भुभागावरील सर्वात कमी तापमानाची नोंद बिहारमधील डेहरी येथे झाली. डेहरी येथे ४.५ अंश सेल्सिअस तापमान होते. 

तर राज्यातील काही भागात किमान तापमानात काहीशी वाढ झाली होती. आज निफाड येथील गहू संशोधन केंद्रात आणि अहिल्यानगर येथे ९.५ अंश सेल्सिअस तापमानाची नोंद झाली होती. आज १० अंशांपेक्षा कमी तापमानाची नोंद झालेली ठिकाणे कमी होती. ढगाळ हवामानाच्या प्रभावामुळे थंडी काहीशी कमी झाली होती. मात्र राज्यातील तापमानात पुढील काही दिवस चढ उतार राहतील, असा अंदाज हवामान विभागाने दिला.