Pune News: राज्यात माॅन्सून दाखल झाल्याने काही भागात जोरदार पाऊस पडत आहे. कोकण आणि मध्य महाराष्ट्रात पावसाचा जोर अधिक आहे. आज सहा जिल्ह्यांना पावसाचा रेड अलर्ट देण्यात आला आहे. हवामान विभागाने कोकण आणि मध्य महाराष्ट्रात पुढील ५ दिवस काही ठिकाणी जोरदार पावसाचा अंदाज आहे. मराठवाडा आणि विदर्भातही काही ठिकाणी पावसाचा जोर राहील, असा अंदाज हवामान विभागाने दिला.

हवामान विभागाने आज ठाणे, मुंबई, रायगड, रत्नागिरी, पुण्याचा घाटमाथा, सातारा जिल्ह्यात काही ठिकाणी विजा आणि मेघगर्जनेसह अतिजोरदार पावसाचा रेड अलर्ट देण्यात आला. रत्नागिरी, सिंधुदूर्ग, सातारा आणि कोल्हापूर जिल्ह्यात उद्याही अतिजोरदार पावसाचा रेड अलर्ट देण्यात आला.

कोकणातील सिंधुदूर्ग, रत्नागिरी, रायगड, पालघर, ठाणे आणि मुंबई जिल्ह्यात पुढील ५ दिवस काही ठिकाणी जोरदार पावसाचा अंदाज देण्यात आला. बुधवारनंतर पालघर, ठाणे, मुंबई आणि रायगड जिल्ह्यात पावसाचा जोर काहीसा कमी होण्याची शक्यता आहे. मात्र सिंधुदूर्ग आणि रत्नागिरी जिल्ह्यात पावसाचा जोर कायम राहण्याचा अंदाज आहे.

मध्य महाराष्ट्रात आज, उद्या आणि बुधवारी पावसाचा जोर कायम राहण्याची शक्यता आहे. पुणे, सातारा, सांगली, कोल्हापूर जिल्ह्यात तुलनेत पावसाचा जोर जास्त राहील. बुधवारनंतर पावसाचा जोर कमी होण्याची शक्यता आहे. सोलापूर, अहिल्यानगर, जळगाव, धुळे आणि नंदूरबार जिल्ह्यातही पुढील ५ दिवस काही ठिकाणी जोरदार पावसाचा अंदाज देण्यात आला.

मराठवड्यातील सर्वच जिल्ह्यांमध्ये पुढील ५ दिवस काही ठिकाणी जोरदार पावसाचा अंदाज आहे. त्यातही बीड, धाराशिव, परभणी, हिंगोली, नांदेड आणि लातूर जिल्ह्यात आजपासून तीन दिवस काही ठिकाणी जोरदार पावसाची शक्यता अधिक आहे. बुधवारनंतर पावसाची जोर कमी होण्याची शक्यता आहे. तसेच छत्रपती संभाजीनगर आणि जालना जिल्ह्यातही पुढील ५ दिवस काही ठिकाणी जोरदार पावसाचा अंदाज आहे.

विदर्भातही दणका देणार

विदर्भातील जिल्ह्यामध्येही पुढील ५ दिवस पाऊस काही ठिकाणी दणका देण्याची शक्यता आहे. बुलडाणा, अकोला, अमरावती, वाशीम, यवतमाळ, नागपूर, वर्धा, भंडारा, गोंदीया, गडचिरोली आणि चंद्रपूर जिल्ह्यात काही ठिकाणी विजा आणि मेघगर्जनेसह वादळी पावसाचा अंदाज हवामान विभागाने दिला.