Pune News: नैर्ऋत्य मोसमी वाऱ्यांचा (मॉन्सून) प्रवास यंदा वेगाने सुरू आहे. मॉन्सूनचे प्रवाह बळकट झाल्याने रविवारपर्यंत (ता. २५) मॉन्सून केरळमध्ये धडकण्याची शक्यता हवामान विभागाने वर्तविली आहे. दरम्यान, मॉन्सूनची सोमवारपर्यंत (ता. १९) झालेली वाटचाल मंगळवारी (ता. २०) कायम होती.

यंदा सर्वसाधारण वेळेच्या तब्बल पाच दिवस आधीच १३ मे रोजी मॉन्सून दक्षिण बंगालचा उपसागर, निकोबार बेटे आणि दक्षिण अंदमान समुद्रात मॉन्सून दाखल झाला. शनिवारपर्यंत (ता. १७) संपूर्ण अंदमान -निकोबार बेट समूह व्यापला असून, बंगालच्या उपसागरातील आणखी काही भागांत मॉन्सूनने प्रगती केली आहे. अरबी समुद्रातून चाल करत मालदीव आणि कोमोरीनच्या आणखी काही भागांसह श्रीलंकेच्या दक्षिण भागात मॉन्सून दाखल झाला होता.

सोमवारी (ता. १९) चाल करत दक्षिण अरबी समुद्र, मालदीव आणि कोमोरीनच्या आणखी काही भागांसह श्रीलंकेच्या बऱ्याचशा भागापर्यंत मजल मारली आहे. बंगालच्या उपसागरातही आणखी काही भागात मॉन्सूनने प्रगती केल्याचे हवामान विभागाने जाहीर केले आहे.

मॉन्सूनच्या वाटचालीस पोषक हवामान असल्याने पुढील चार दिवसांत संपूर्ण मालदीव, कोमोरीन उर्वरित भागांसह, लक्षद्वीप, केरळ, तमिळनाडूसह, बंगालच्या उपसागराचा आणखी काही भाग आणि पूर्वोत्तर राज्याच्या काही भागांत मॉन्सूनची प्रगती होण्याची शक्यता आहे.

अरबी समुद्रात कमी दाबाचे संकेत

पूर्व-मध्य अरबी समुद्रात कर्नाटकच्या किनाऱ्यालगत आज (ता. २१) चक्राकार वाऱ्यांची स्थिती तयार होण्याची शक्यता आहे. या वाऱ्यांच्या प्रभावामुळे उद्यापर्यंत (ता. २२) या भागात कमी दाब क्षेत्राची निर्मिती होण्याचे संकेत आहेत. उत्तरेकडे जाताना ही प्रणाली आणखी तीव्र होण्याची शक्यता वर्तविण्यात आली आहे.