Pune News: नैर्ऋत्य मोसमी वाऱ्यांनी (मॉन्सून) बुधवारी (ता. २०) पुढे वाटचाल करत दक्षिण अरबी समुद्र, मालदीव आणि कोमोरीन, तसेच बंगालच्या उपसागराचा आणखी काही भाग आणि श्रीलंकेचा बहुतांश भाग व्यापला आहे. येत्या रविवारपर्यंत (ता. २५) मॉन्सून केरळमध्ये धडकण्याची शक्यता हवामान विभागाने वर्तविली आहे.  

यंदा सर्वसाधारण वेळेच्या तब्बल पाच दिवस आधीच १३ मे रोजी मॉन्सून दक्षिण बंगालचा उपसागर, निकोबार बेटे आणि दक्षिण अंदमान समुद्रात मॉन्सून दाखल झाला.

सोमवारी (ता. १९) प्रगती कायम ठेवत दक्षिण अरबी समुद्र, मालदीव आणि कोमोरीनच्या आणखी काही भागासह श्रीलंकेच्या बऱ्याचशा भागापर्यंत मजल मारली होती. बंगालच्या उपसागरातही आणखी काही भागांत मॉन्सूनने प्रगती सुरूच ठेवली आहे.

मंगळवारी (ता.२१) श्रीलंकेचा बहुतांश भाग व्यापणाऱ्या मॉन्सूनचा पुढील प्रवास वेगाने होण्याची शक्यता असल्याने पुढील तीन ते चार दिवसांत संपूर्ण मालदीव, कोमोरीन उर्वरित भागासह, लक्षद्वीप, केरळ, तमिळनाडूसह, बंगालच्या उपसागराचा आणखी काही भाग आणि पूर्वोत्तर राज्याच्या काही भागात मॉन्सूनची प्रगती होण्याची शक्यता आहे.