Jalgaon News : खानदेशात किमान तापमन १४ अंश सेल्सिअसखाली आले आहे. यामुळे रब्बी हंगामातील पिकांना लाभ होईल, अशी अपेक्षा आहे. गेल्या आठवड्यात थंडी होती. परंतु मागील मंगळवारी (ता. २३) रात्री वातावरणात चांगलाच गारठा तयार झाला. सायंकाळनंतर मंद गार वारे सुटले. यानंतर मध्यरात्री किमान तापमान १४ अंश सेल्सिअसखाली पोहोचले.

या मोसमात प्रथमच किमान तापमान १४ अंश सेल्सिअसपेक्षा कमी असल्याची नोंद जळगाव येथील कृषी संशोधन केंद्राचे हवामान केंद्र, धुळे येथील कृषी विज्ञान केंद्रात झाली. यंदा थंडी सुरुवातीपासून चांगली राहणार, असल्याचे चित्र असल्याने शेतकऱ्यांतही उत्साह आहे. कारण याचा कोरडवाहू रब्बी पिकांचा चांगला लाभ होईल. हुडहुडी भरविणारी थंडी मागील वर्षी नसल्याने कोरडवाहू रब्बी पिकांचे नुकसानही सुरुवातीला झाले.

यातच या महिन्यात काही दिवस ढगाळ वातावरण तयार झाले. मध्यंतरी सात ते आठ दिवस ढगाळ वातावरण होते. यामुळे कोरडवाहू रब्बी पिकांमध्ये हरभरा, दादर ज्वारीचे बीजांकुरण कसे होईल, त्यात यश मिळेल की नाही, असा संभ्रम होता. प्रतिकूल स्थितीत इतर पिकांतही रोगाची समस्या दिसत होती.

एन पेरणी, केळी व इतर पिकांच्या वाढीच्या वेळेस थंडीची गरज होती. परंतु गेल्या दोन दिवसांपासून थंडी पडत आहे. गुरुवारी (ता. २७) किमान तापमान १४ अंश सेल्सिअस यादरम्यान होते.

गारठा तयार होत अससल्यामुळे रब्बी पिके जोमात येतील, अशी अपेक्षा शेतकऱ्यांना आहे. थंडी वाढेल किंवा कायम राहील, हे लक्षात घेता अनेक केळी उत्पादकांनी पिकाला रात्रीच्या वेळेस पाणी देण्याचे नियोजन केले आहे.