Maharashtra Weather Forecast : पुणे : राज्याच्या किमान तापमानात घट होऊ लागल्याने थंडीची चाहूल लागली आहे. विदर्भासह उत्तर महाराष्ट्रातही किमान तापमानात घट झाली आहे. आज (ता. १३) उर्वरित राज्याच्या किमान तापमानात चढ-उतार होण्याची शक्यता हवामान विभागाने वर्तविली आहे.

आग्नेय अरबी समुद्रात मालदीव बेटांजवळ समुद्रसपाटीपासून ३.१ किलोमीटर उंचीवर चक्राकार वाऱ्यांची स्थिती कायम आहे. राज्यात आकाश निरभ्र होत असून, पहाटे गारठा वाढला असून, दुपारी मात्र ऊन असल्याचे दिसून येत आहे. पहाटे तुरळक धुके आणि दव पडल्याचे चित्र कायम आहे. राज्याच्या किमान तापमानात काहीशी वाढ-घट होण्याची शक्यता आहे.

मंगळवारी (ता. १२) सकाळपर्यंतच्या २४ तासांमध्ये रत्नागिरी येथे देशातील उच्चांकी ३५.५ अंश सेल्सिअस तापमान नोंदले गेले. राज्यात बहुतांश ठिकाणी कमाल तापमान २४ ते ३१ अंशांच्या दरम्यान होते. तर निफाड येथील गहू संशोधन केंद्र आणि चंद्रपूर येथे राज्यातील नीचांकी १३ अंश सेल्सिअस किमान तापमानाची नोंद झाली.

मंगळवारी (ता. १२) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :
पुणे ३१.० (१५.७), जळगाव २९.५ (१५.९), कोल्हापूर ३०.२ (१९.०), महाबळेश्वर २६.६ (१५.५), नाशिक ३०.३ (१४.०), निफाड २९.० (१३.०), सांगली ३०.१ (१७.९), सातारा ३०.४ (१७.४), सोलापूर ३२.२(१७.३), सांताक्रूझ ३३.१ (२०.५), डहाणू ३०.३ (१९.८), रत्नागिरी ३५.५ (२२.१), छत्रपती संभाजीनगर २९.० (१५.४), नांदेड २९.६ (१६.२), परभणी ३०.० (१६.०), अकोला ३०.२ (१६.४), अमरावती २८.६ (१५.३), बुलढाणा २९.३ (१४.६), ब्रह्मपुरी ३१.१ (१४.९), चंद्रपूर २८.२(१३.०), गडचिरोली २९.६ (१३.२), गोंदिया २६.९ (१३.२), नागपूर २८.०(१४.४), वर्धा २८.०(१४.५), वाशीम ३०.२ (१४.४), यवतमाळ ३०.५ (१६.२).