Weather News : पुणे : सूर्य आग ओकत असल्याने उन्हाच्या झळांनी राज्य भाजून निघत आहे. विदर्भात उन्हाचा चटका अधिक असून, मंगळवारी (ता. २२) सकाळपर्यंतच्या २४ तासांमध्ये चंद्रपूर येथे देशातील उच्चांकी ४५.६ अंश तापमानाची नोंद झाली. आज (ता. २३) विदर्भात उष्ण लाटेचा, तर कोकण आणि मराठवाड्यात उष्ण व दमट हवामानाचा अंदाज असल्याने दक्षतेचा इशारा (येलो अलर्ट) आहे. उर्वरित राज्यात उन्हाचा चटका कायम राहण्याची शक्यता हवामान विभागाने वर्तविली आहे.

बिहार आणि परिसरावर चक्राकार वाऱ्यांची स्थिती आहे. त्यापासून छत्तीसगड, पूर्व विदर्भ, तेलंगणा, कर्नाटक, तमिळनाडू ते मनारच्या आखातापर्यंत दक्षिणोत्तर हवेचा कमी दाबाचा पट्टा विस्तारला आहे. राज्यात उन्हाचा चटका आणि उकाडा कायम असून, तुरळक ठिकाणी अंशतः ढगाळ हवामान अनुभवायला मिळत आहे. विदर्भ देशात उष्ण ठरत असून, देशातील पहिल्या दहा उष्ण शहरात विदर्भातील चंद्रपूर, ब्रह्मपुरी, अमरावती आणि अकोला या शहरांचा समावेश आहे.

मंगळवारी (ता. २२) सकाळपर्यंतच्या २४ तासांमध्ये चंद्रपूरसह ब्रह्मपुरी येथे ४५ अंश सेल्सिअस, अमरावती, अकोला येथे ४४ अंश सेल्सिअस, तर नागपूर, वर्धा, यवतमाळ, सोलापूर, गडचिरोली येथे ४३ अंश सेल्सिअस तापमान नोंदले गेले. तर जळगाव, जेऊर, मालेगाव, धाराशिव, परभणी, गोंदिया आणि वाशीम येथे पारा ४२ अंशांपार होता.

आज (ता. २३) विदर्भातील अकोला, अमरावती, नागपूर आणि चंद्रपूर येथे उष्ण लाट येण्याची शक्यता आहे. तसेच कोकणातील ठाणे, रायगड, रत्नागिरी, मध्य महाराष्ट्रातील सोलापूर मराठवाड्यातील बीड, परभणी, हिंगोली, धाराशिव, लातूर आणि नांदेड या जिल्ह्यात तुरळक ठिकाणी उष्ण व दमट हवामानाचा अंदाज असल्याने दक्षतेचा इशारा (येलो अलर्ट) देण्यात आला आहे. उर्वरित राज्यात उन्हाचा चटका तापदायक ठरण्याचा अंदाज वर्तविण्यात आला आहे.

मंगळवारी (ता. २२) सकाळी ८.३० पर्यंतच्या २४ तासांमध्ये नोंदले गेलेले तापमान (अंश सेल्सिअसमध्ये) :

ठिकाणे---तापमान कमाल---तापमान किमान
पुणे---३९.९---२२.०
अहिल्यानगर---३८.०---२३.५
धुळे---४१.०---१८.६
जळगाव---४२.०---२४.५
जेऊर---४२.५---२२.५
कोल्हापूर---३५.८---२४.३
महाबळेश्‍वर---३२.७---२१.०
मालेगाव---४२.२---२४.२
नाशिक---३८.४---२१.६
निफाड---३९.७---२०.०
सांगली---३७.७---२५.४

सातारा---३९.३---२५.४
सोलापूर---४३.०---२७.९
सांताक्रूझ---३३.६---२३.५
डहाणू---३६.४---२४.०
रत्नागिरी---३३.८---२६.१
छत्रपती संभाजीनगर---४०.९---२६.६
धाराशिव---४२.२---२३.०
परभणी---४२.२---२६.६
परभणी (कृषी)---४१.५---२२.९
अकोला---४४.१---२६.५
अमरावती---४४.६---२४.९
भंडारा---४१.४---२५.०

बुलडाणा---३९.८---२६.५
ब्रह्मपुरी---४५.०---२७.६
चंद्रपूर---४५.६---निरंक
गडचिरोली---४३.०---२४.६
गोंदिया---४२.१---२४.४
नागपूर---४३.६---२४.७
वर्धा---४३.४---२७.८
वाशीम---४२.५---निरंक
यवतमाळ---४३.४---२६.०

सरासरी तापमान (अंश से.)
विभाग---किमान---कमाल
विदर्भ---२४.४---४५.६
मराठवाडा---२२.९---४२.२
पश्‍चिम महाराष्ट्र---२१.०---४३.०
उत्तर महाराष्ट्र---१८.६---४२.२
कोकण---२३.५---३६.४

बुधवारी (ता. २३) राज्यातील उष्ण हवामान आणि पावसाचा अंदाज दर्शवणारा नकाशा (स्रोत : हवामान विभाग) :

उष्ण लाटेचा इशारा (येलो अलर्ट) :
अकोला, अमरावती, नागपूर, चंद्रपूर.

उष्ण व दमट हवामानाचा इशारा (येलो अलर्ट) :
ठाणे, रायगड, रत्नागिरी, सोलापूर, बीड, परभणी, हिंगोली, धाराशिव, लातूर, नांदेड.

४३ अंशांपेक्षा अधिक तापमान असलेली ठिकाणे :
चंद्रपूर ४५.६, ब्रह्मपुरी ४५, अमरावती ४४.६, अकोला ४४.१, नागपूर ४३.६, वर्धा ४३.४, यवतमाळ ४३.४, सोलापूर ४३, गडचिरोली ४३.