Pune News : राज्यात सध्या काही भागात उष्णतेची लाट आणि काही भागात पावसाची हजेरी असे चित्र दिसत आहे. हवामान विभागाने पुढील पाच दिवस कोकणात काही ठिकाणी उष्णतेच्या लाटेचा इशारा दिला. तर राज्यातील इतर भागात काही ठिकाणी पावसाचा अंदाज दिला. \

हवामान विभागाने आज कोकणातील सिंधुदूर्ग, रत्नागिरी, रायगड, ठाणे आणि मुंबई जिल्ह्यात काही ठिकाणी उष्णतेच्या लाटेचा इशारा दिला. तर संपूर्ण विदर्भात विजा आणि मेघगर्जनेसह पावसाचा येलो अलर्ट देण्यात आला.

तसेच सांगली, सोलापूर, धाराशिव आणि लातूर जिल्ह्यातही ठिकठिकाणी विजा आणि मेघगर्जनेसह पावसाचा अंदाज देण्यात आला. मध्य महाराष्ट्रातील कोल्हापूर, सातारा, पुणे, नगर, बीड, परभणी, नांदेड आणि हिंगोली जिल्ह्यातील काही भागातही हलक्या सरी पडतील, असा अंदाज हवामान विभागाने दिला.

उद्याही सिंधुदूर्ग, रत्नागिरी, रायगड, ठाणे आणि मुंबई जिल्ह्यात काही ठिकाणी उष्णतेच्या लाटेचा अंदाज आहे. तर मध्य महाराष्ट्रात पावसाची शक्यता आहे. कोल्हापूर, सातारा, सांगली, सोलापूर, पुणे आणि नगर तर मराठवाड्यातील बीड, धाराशिव, लातूर, परभणी, नांदेड आणि हिंगोली तर विदर्भातील यवतमाळ, चंद्रपूर, गडचिरोली आणि गोंदीया जिल्ह्यात काही ठिकाणी विजा आणि मेघगर्जनेसह पावसाचा अंदाज हवामान विभागाने दिला.

कोकणातील काही ठिकाणी गुरुवार, शुक्रवार आणि शनिवारी सुध्दा उष्णतेच्या लाटेचा इशारा हवामान विभागाने दिला. तर मध्य महाराष्ट्र, मराठवाडा आणि विदर्भातील काही भागात हलक्या ते मध्यम पावसाचा अंदाजही हवामान विभागाने दिला.