IMD Alert : राज्यातील तापमानात घट येऊ लागली आहे. त्यामुळे हळूहळू गारठा वाढू लागला आहे. सकाळी वातावरणात गारवा जाणवू लागला आहे. तसेच दुपारच्या तापमानात घट झाली आहे. हवामान विभागाने पुढील पाच दिवस कोरड्या हवामानाचा अंदाज दिला आहे. त्यामुळे संपूर्ण राज्यात पावसाची शक्यता नाही, असं जाहीर केलं आहे. 

मागील २४ तासात जळगाव येथे सर्वात कमी १०.९ अंश सेल्सियसपर्यंत तापमान घसरलं होतं. त्यामुळे उत्तर खानदेशात गारठा वाढला आहे. राज्यात पुढील दोन दिवसांनी थंडी वाढू लागेल, असा अंदाजही हवामान विभागाने दिला आहे. 

राज्यात विविध भागात पुढील ४ ते ५ कमला तापमानात मोठी वाढ होण्याची शक्यता नाही. त्याचबरोबर १-२ अंश सेल्सिअसने तापमानाचा पार घसरण्याची शक्यता आहे. मात्र येत्या दोन दिवसात तापमानाचा पारा आणखी खाली घसरण्याची शक्यता असल्याने राज्यात थंडी वाढण्याची शक्यता हवामान विभागाने वर्तवली आहे.

दरम्यान, राज्यात कोरड्या हवामानामुळे खरीपातील पीक काढणीला गती आली आहे. तसेच जमिनीत ओल असलेल्या बहुतांश भागात शेतकरी रब्बी पेरणी करत आहेत.