Pune News : राज्याच्या किमान तापमानात झालेल्या वाढीमुळे राज्यात गारठा कमी झाला आहे. दुपारच्या वेळी उन्हाचा चटका आणि उकाड्यातील वाढ कायम आहे. आज (ता. ७) राज्याच्या किमान तापमानातील वाढ कायम राहण्याची शक्यता आहे. विदर्भ, मराठवाड्यात पावसाला पोषक हवामान होत असून, शुक्रवारपासून (ता. ९) हलक्या पावसाचा अंदाज हवामान विभागाने वर्तविला आहे.

उत्तर भारतात थंडीचा कडाका कमी झाला आहे. मंगळवारी (ता. ६) हरियानातील कर्नाल यथे देशाच्या सपाट भूभागावरील नीचांकी ४.२ अंश सेल्सिअस तापमान नोंदले गेले. उर्वरित देशाच्या किमान तापमानात वाढ झाली आहे.

यातच मध्य प्रदेशापासून विदर्भ, मराठवाडा, कर्नाटकपर्यंत हवेचा कमी दाबाचा पट्टा तयात झाला आहे. यामुळे विदर्भ आणि मराठवाड्यात पावसाला पोषक हवामान होत आहे.

राज्यात कमाल आणि किमान तापमानात वाढ झाली आहे. निफाड येथील गहू संशोधन केंद्रात नीचांकी १० अंश तापमान नोंदले गेले असून, उर्वरित राज्यात किमान तापमान ११ ते २२ अंशांच्या दरम्यान आहे. तर कमाल तापमानात वाढ झाल्याने सांताक्रूझ येथे राज्यातील उच्चांकी ३६.३ अंश सेल्सिअस तापमान नोंदले गेले. अनेक ठिकाणी पारा ३३ अंशांच्या वर आहे. आज (ता. ६) किमान तापमानातील वाढ कायम राहण्याची शक्यता आहे.

मंगळवारी (ता. ६) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३४.८ (१६), धुळे ३५ (११.५), जळगाव (१५.२), कोल्हापूर ३३.६ (२१.१), महाबळेश्‍वर २८.३ (१८.५), मालेगाव ३५.६ (१५.६), नाशिक ३२.५ (१३.६), निफाड ३१.४ (१०), सांगली ३४.४ (२०.२), सातारा ३४.१ (१८), सोलापूर ३६.३ (२१.६), सांताक्रूझ ३३.१ (१९.४), डहाणू ३०.८ (१९), रत्नागिरी ३३.५ (२१.७),

छत्रपती संभाजीनगर ३३.४ (१६.५), नांदेड (२०.६), परभणी ३४.६ (१८.५), अकोला ३५.४ (१७.६), अमरावती ३३ (१६.९), बुलडाणा ३३.४ (१७.६), ब्रह्मपुरी ३४.२ (२०.२), चंद्रपूर ३३.४ (१५.२), गडचिरोली ३२.४ (१६.६), गोंदिया ३२ (१८), नागपूर ३३.८ (१७), वर्धा ३४.१ (१७.९), वाशीम ३४ (१६.६), यवतमाळ ३४.५ (१७.२).