Rain Alert : माॅन्सूनचा परतीचा प्रवास गेल्या दोन दिवसांपासून थांबला आहे. माॅन्सूनच्या वाटचालीसाठी पोषक हवामान नसल्याने वाटचाल थबकली आहे. देशात काही ठिकाणी पाऊस पडत आहे. पण राज्यात उन्हाचा चटका चांगलाच वाढला आहे.

माॅन्सूनचा परतीचा प्रवास मागील दोन दिवसांपासून थबकला आहे. सोमवारी माॅन्सूनने देशातील काही भागांमधून काढता पाय घेतला होता. माॅन्सून सोमवारी पूर्व उत्तर प्रदेश आणि पूर्व मध्य प्रदेशच्या सर्व भागातून माॅन्सून परतला होता. तर बिहारचा आणखी काही भाग, झारखंड, छत्तसगड, तेलंगणा आणि उत्तर कर्नाटकच्या आणखी भागातून माॅन्सूनने माघार घेतली होती. तर महाराष्ट्राच्या बहुतांशी भागातून माॅन्सून परतला.

माॅन्सून कोकणातील सिंधुदूर्ग जिल्ह्याचा काही भाग आणि विदर्भातील गडचिरोली जिल्ह्यातील काही भागात आहे. माॅन्सूनच्या परतीची सिमा दौलतगंज, कांकेर, रामागुंडम, बिजापूर आणि वेंगुर्ला या भागात कायम होती. देशातील काही भागात हलक्या ते मध्यम स्वरुपाच्या सरी पडत आहेत. अरुणाचल प्रदेश, सिक्कीम, आसाम, मेघालय आणि हिमालयाच्या शेजारच्या भागात पाऊस पडत आहे.

राज्यात मात्र उन्हाचाकडाका चांगलाच वाढला. राज्यात सकाळपासूनच उन्हाची ताप वाढत आहे. तर रात्री काही प्रमाणात गारवा जाणवतो. दुपारी उन्हाचा चटका असह्य होत आहे. राज्याच्या बहुतांशी भागात तापमानात वाढ झाली आहे. यामुळे पिकांना सिंचन करण्याची वेळ आल्याचे शेतकरी सांगत आहेत. राज्यात पुढील पाच दिवस हवामान उष्ण आणि कोरडे राहण्याचा अंदाज असल्याचे हवामान विभागाने जाहीर केले.