Pune News: राज्यात उन्हाळ्याची सुरुवात झाल्याने दिवसेंदिवस उन्हाचा चटका वाढत आहे. कोकणात तापमानाचा पारा ३८ अंशांपार पोहोचल्याने उष्णतेची लाट आली आहे. मंगळवारी (ता. २५) सकाळपर्यंतच्या २४ तासांमध्ये रत्नागिरी येथे ३८.९ अंश तापमान नोंदले गेले. आज (ता. २६) कोकणात उष्ण लाटेचा इशारा (येलो अलर्ट) देण्यात आहे. उर्वरित राज्यातही उन्हाचा चटका कायम राहण्याची शक्यता हवामान विभागाने वर्तविली आहे.

देशातील कमाल तापमानात वाढ होत असून, मंगळवारी (ता. २५) आंध्र प्रदेशातील कर्नुल येथे देशातील उच्चांकी ४०.४ अंश सेल्सिअस तापमानाची नोंद झाली. तर कोकणातील रत्नागिरी येथे ३८.९, तर सांताक्रूझ येथे ३८.४ अंश सेल्सिअस तापमानाची नोंद झाली. किनारपट्टीय भागात कमाल तापमानात सरासरीपेक्षा ४.५ अंशांची वाढ झाली किंवा तापमान ३७.५ अंशांच्या पुढे गेले तर उष्णतेची लाट आली असे समजले जाते. त्यानुसार कोकणात बहुतांश ठिकाणी उष्णतेची लाट आली आहे.

दरम्यान, दक्षिण मध्य महाराष्ट्रातील सोलापूर, सांगली, जेऊर, सातारा, विदर्भातील अकोला, यवतमाळ, ब्रह्मपुरी आणि चंद्रपूर येथे तापमान ३६ अंशांच्यावर होते. उन्हाचा चटका वाढल्याने दुपारच्या वेळी घराबाहेर पडणे तापदायक ठरत आहे. उकाड्याने घामाच्या धारा वाहत आहेत. उत्तर महाराष्ट्रासह पहाटे काहीसा थंडावा कायम आहे.

मंगळवारी (ता. २५) निफाड येथील गहू संशोधन केंद्रात राज्यातील नीचांकी ११.४ अंश सेल्सिअस तापमानाची नोंद झाली.आज (ता. २६) कोकणातील पालघर, ठाणे, मुंबई, रायगड आणि रत्नागिरी जिल्ह्यांत उष्ण लाटेचा इशारा असल्याने सतर्कतेचा (येलो अलर्ट) देण्यात आला आहे. तर सिंधुदुर्ग जिल्ह्यात उष्ण व दमट हवामानाचा इशारा कायम आहे. उर्वरित राज्यात कमाल तापमानात वाढ होण्याची शक्यता हवामान विभागाने वर्तविली आहे.

मंगळवारी (ता. २५) सकाळी ८.३० वाजेपर्यंतच्या २४ तासांमध्ये नोंदले गेलेले तापमान (अंश सेल्सिअसमध्ये) :
ठिकाणे---तापमान कमाल---तापमान किमान
पुणे---३५.---१४.६
अहिल्यानगर---३४.८---१२.७
धुळे---३४---१२
जळगाव---३४.८---१२.८
जेऊर---३६.५---१५.५

कोल्हापूर---३४.४---२०.३
महाबळेश्‍वर---३०.२---१६.९
मालेगाव---३३.६---१६.६
नाशिक---३३.८---१५.७
निफाड---३३---११.४
सांगली---३६.६---१९.९
सातारा---३६---१७
सोलापूर---३७.६---१९.४

सांताक्रूझ---३८.४---२५.४
डहाणू---३४.४---२०.४
रत्नागिरी---३८.९---२१.५
छत्रपती संभाजीनगर---३५.२---१७.५
धाराशिव---३४.६---१७.१
परभणी---३५.०---१५.९
परभणी (कृषी)---३५---१२.५
अकोला---३६.४---१९.८

अमरावती---३४.८---१८.७
भंडारा---३४---१७.२
बुलडाणा---३४---१७.२
ब्रह्मपुरी---३६.९---१६.४
चंद्रपूर---३६---निरंक
गडचिरोली---३५---१७
गोंदिया---३२.८---१५.८
नागपूर---३४.१---१७.६
वर्धा---३४.५---१६.५
वाशीम---३५.६---निरंक
यवतमाळ---३६.२---१९.२

उष्ण लाटेचा इशारा (येलो अलर्ट) : पालघर, ठाणे, मुंबई, रायगड, रत्नागिरी.

उष्ण व दमट हवामानाचा इशारा (येलो अलर्ट) : सिंधुदुर्ग.

३६ अंशांपेक्षा अधिक तापमान असलेली ठिकाणे :

रत्नागिरी ३८.९, सांताक्रूझ ३८.४, सोलापूर ३७.६, ब्रह्मपुरी ३६.९, सांगली ३६.६, जेऊर ३६.५, अकोला ३६.४, यवतमाळ ३६.२, सातारा ३६, चंद्रपूर ३६.