Pune News: राज्यातील अनेक भागात आजही वादळी पावसाचा अंदाज आहे. तर विदर्भातील ३ जिल्ह्यांमध्ये आज गारपीटीचा शक्यता आहे. पुढील ५ दिवस राज्यातील काही भागात वादळी पावसाची शक्यता आहे तर कोकणात शनिवारपासून उष्ण आणि दमट हवामानाचा इशारा देण्यात आला.

विदर्भातील चंद्रपूर, वर्धा आणि यवतमाळ जिल्ह्यात काही ठिकाणी विजा आणि ढगांच्या गडगडाटासह गारपीटीची शक्यता आहे. तर यावेळी ४० ते ५० किलोमीटर प्रतितास वेगाने वारेही वाहतील, असाही अंदाज हवामान विभागाने दिला. विदर्भातील बुलडणा, अकोला, अमरावती, यवतमाळ, वाशीम, वर्धा, नागपूर, गडचिरोली, भंडारा, गोंदीया आणि चंद्रपूर जिल्ह्यात आज आणि उद्या काही ठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज आहे. यावेळी जोरदार वारेही वाहतील, असाही इशारा हवामान विभागाने दिला.

मराठवाड्यातील धाराशिव, लातूर, नांदेड, परभणी, हिंगोली, बीड, जालना आणि छत्रपती संभाजीनगर जिल्ह्यातही आज आणि उद्या काही भागात वादळी पावसाचा अंदाज आहे. लातूर आणि धाराशिव जिल्ह्यात ४ दिवस पावसासाठी पोषक स्थिती निर्माण झाली आहे. 

मध्य महाराष्ट्रातही पावसासाठी पोषक हवामान आहे. अहिल्यानगर, पुणे, सातारा, सांगली, सोलापूर जिल्ह्यात काही ठिकाणी पुढील ४ दिवस विजा आणि ढगांच्या गडगडाटासह वादळी पावसाचा अंदाज हवामान विभागाने दिला. तर कोल्हापूर, नाशिक जिल्ह्यात आज आणि उद्या तसेच धुळे, नंदूरबार आणि जळगाव जिल्ह्यातही आज काही ठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज आहे.

कोकणातील पालघर, ठाणे, मुंबई आणि रायगड जिल्ह्यात आज तर रत्नागिरी आणि सिंधुदूर्ग जिल्ह्यात आज आणि उद्या काही ठिकाणी विजा तसेच ढगांच्या गडगडाटासह हलक्या ते मध्यम पावासाचा अंदाज आहे. तर कोकणात शनिवारपासून उष्ण आणि दमट हवामानाचा इशाराही हवामान विभागाने दिला.