Pune News: राज्यातील अनेक भागात अवकाळी पावसाला पोषक वातावरण होत आहे. हवामान विभागाने पुढील ५ दिवस कोकण, मध्य महाराष्ट्र, मराठवाडा आणि विदर्भात काही ठिकाणी ढगाळ वातावरणासह अवकाळी पावसाचा अंदाज दिला. तर काही ठिकाणी गारपीटीची शक्यताही व्यक्त केली. 

हवामान विभागाने रत्नागिरी आणि सिंधुदूर्ग जिल्ह्यात आजपासून ५ दिवस तर पालघर, ठाणे, मुंबई आणि रायगड जिल्ह्यात सोमवार, मंगळवार आणि बुधवारी काही ठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज दिला. यावेळी ३० ते ४० किलोमीटर प्रतितास वेगाने वारे वाहतील, अशी शक्यता आहे. उत्तर महाराष्ट्रातील धुळे, नंदूरबार आणि जळगाव जिल्ह्यातही काही ठिकाणी सोमवार, मंगळवार आणि बुधवारी विजा तसेच ढगांच्या गडगडाटासह हलक्या पावसाचा अंदाज आहे. यावेळी जोरदार वारेही वाहतील. 

नाशिक आणि अहिल्यानगर जिल्ह्यातही सोमवारपासून तीन दिवस अवकाळी पावसाचा अंदाज आहे. तर नाशिक जिल्ह्यात काही ठिकाणी मंगळवारी गारपीटीची शक्यताही जाणवत असल्याचे हवामान विभागाने म्हटले आहे. या दोन्ही जिल्ह्यांमध्येही जोरदार वारे वाहतील, असाही अंदाज हवामान विभागाने दिला. पुणे जिल्ह्यात रविवारपासून बुधवापर्यंत काही भागात आवकाळी पावसाचा अंदाज आहे. 

कोल्हापूर, सांगली आणि सातारा जिल्ह्यात आजपासून बुधवारपर्यंत विजा आणि ढगांच्या गडगडाटासह हलक्या ते मध्यम पावसाचा अंदाज आहे. तर बुधवारी कोल्हापूर जिल्ह्यात काही ठिकाणी गारपीटही होऊ शकते, अशी शक्यता हवामान विभागाने वर्तविली. 

छत्रपती संभाजीनगर आणि जालना जिल्ह्यात काही ठिकाणी मंगळवार आणि बुधवारी विजा आणि ढगांच्या गडगाडाटासह हलक्या ते मध्यम पावसाचा अंदाज आहे. तर दोन्ही दिवस या जिल्ह्यांमध्ये काही ठिकाणी गारपीटीचाही इशारा हवामान विभागाने दिला. परभणी, बीड, हिंगोली, नांदेड, लातूर, धाराशिव जिल्ह्यातही पुढील ४ दिवस पावसाचा अंदाज आहे. बीड जिल्ह्यात बुधवारी काही ठिकाणी गारपीटीचा अंदाज आहे. 

विदर्भातील अकोला, अमरावती, बुलडाणा, वाशिम जिल्ह्यात मंगळवार आणि बुधवारी तर चंद्रपूर, गडचिरोली, भंडारा, गोंदीया, नागपूर, वर्धा आणि यवतमाळ जिल्ह्यात बुधवारी काही ठिकाणी विजा आणि ढगांच्या गडगाडाटासह हलक्या ते मध्यम पावसाचा अंदाज हवामान विभागाने दिला.