Pune Weather News : राज्यात ऑक्टोबर हीटच्या चटक्याने तडाखा दिल्याने उन्हाची ताप, उकाडा वाढला आहे. यातच दक्षिण कोकणात पावसाने हजेरी लावली असून, ढगाळ हवामान झाल्याने कमाल तापमानात चढ-उतार सुरू आहे. आज (ता. १७) सिंधुदुर्ग, रत्नागिरी आणि कोल्हापूर जिल्ह्यात तुरळक ठिकाणी विजांसह पावसाची शक्यता हवामान विभागाने वर्तविली आहे.

पूर्वोत्तर भारतातील राज्ये आणि दक्षिण भारताचा काही भाग वगळता देशाच्या बहूतांश भागातून मॉन्सून परतला आहे. मॉन्सूनच्या परतीसाठी पोषक वातावरण झाल्याने उद्यापर्यंत (ता. १८) पूर्वोत्तर राज्यासह, दक्षिण आणि पूर्व भारतातील आणखी काही भागातून मॉन्सून परतण्याची शक्यता आहे. तामिळनाडू किनाऱ्यालगत चक्राकार वाऱ्यांची स्थिती आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

राज्यात ऑक्टोबर हीटचा चटका तापदायक ठरत असून, अनेक ठिकाणी कमाल तापमान सातत्याने ३५ अंशांच्या पुढे आहे. सोमवारी (ता. १६) सकाळपर्यंतच्या २४ तासांमध्ये अकोला येथे राज्यातील उच्चांकी ३७ अंश सेल्सिअस तापमानाची नोंद झाली. तर जळगाव, वाशीम येथे तापमान ३६ अंशांपेक्षा अधिक तापमानाची नोंद झाली.

रविवारी (ता. १५) पावसाने हजेरी लावल्याने कणकवली येथे सर्वाधिक ७० मिलीमीटर पावसाची नोंद झाली. तर चिपळूण ३०, मुलदे, वैभववाडी येथे २० मिलीमीटर, तर दोडामार्ग, सुधागड पाली येथे १० मिलीमीटर पाऊस पडल्याने हवामान विभागाने म्हटले आहे. आज (ता. १७) तापमानातील चढ-उतार कायम राहून, ढगाळ हवामानाची शक्यता आहे. सिंधुदुर्ग, रत्नागिरी, कोल्हापूरमध्ये तुरळक ठिकाणी विजांसह पावसाची शक्यता आहे.

सोमवारी (ता. १६) सकाळपर्यंतच्या २४ तासांमध्ये राज्यातील कमाल तापमान (अंश सेल्सिअस मध्ये) :

पुणे ३४.७, जळगाव ३६.८, कोल्हापूर ३२.४, महाबळेश्वर २६.९, नाशिक ३३.१, सांगली ३२.८, सातारा ३३.३, सोलापूर ३५.८, सांताक्रूझ ३४.६, डहाणू ३४.६, रत्नागिरी ३२.८, छत्रपती संभाजीनगर ३२.८, नांदेड ३४.६, परभणी ३५.१, अकोला ३७.०, अमरावती ३५.८, बुलडाणा ३४.४, ब्रह्मपूरी ३५.८, चंद्रपूर ३४.४, गडचिरोली ३४.४, गोंदिया ३४.४, नागपूर ३३.९, वर्धा ३५.०, वाशीम ३६.२, यवतमाळ ३५.७.

अरबी समुद्रात कमी दाबाची शक्यता

आग्नेय अरबी समुद्रात लक्षद्वीप बेटांच्या जवळ समुद्र सपाटीपासून ३.१ किलोमीटर उंचीवर चक्राकार वाऱ्यांची स्थिती कायम आहे. या चक्राकार वाऱ्यांमुळे उद्यापर्यंत (ता.१८) या भागात कमी दाबाचे क्षेत्र तयार होण्याचे संकेत आहेत. वायव्येकडे सरकताना ही प्रणाली आणखी तीव्र होण्याचा अंदाज हवामान विभागाने वर्तविला आहे.

उन्हाचा चटका अधिक असलेली ठिकाणे :

अकोला ३७.०, जळगाव ३६.८, वाशीम ३६.२.