Pune News : गेली दोन आठवडे गायब झालेली थंडी पुन्हा जावणत आहे. राज्यातील काही भागात तापमानाचा पारा कमी होत आहे. काही ठिकाणी पुन्हा तापमान १० अंशाच्या खाली दिसत आहे. राज्यात थंडी वाढण्याची शक्यता आहे. तर किमान तापमानात आणखी घट होईल, असा अंदाज हवामान विभागाने दिला.

आज राज्यातील अनेक भागात सकाळी थंडीचा कडाका जाणवला. आज धुळे येथील कृषी महाविद्यालयात सर्वात कमी ७ अंश सेल्सिअस तापमानाची नोंद झाली. तर निफाड येथील गहू संशोधन केंद्रात ८.२ अंश सेल्सिअस तापमान होते. तर मोहोळ येथेही तापमानात घट होऊन ९.३ अंश सेल्सिअस तापमानाची नोंद झाली होती. राज्यातील अनेक ठिकाणी आज किमान तापमान कमी झाले आहे.

उत्तर भारतातही थंडीचा कडाका कमी जास्त होत आहे. आज मध्य प्रदेशातील नवगाव येथे सपाट भूभागावरील नीचांकी ४.४ अंश सेल्सिअस तापमानाची नोंद झाली. तर सर्वाधिक तापमान केरळमधील कन्नूर येथे ३५.८ अंश सेल्सिअस होते. दक्षिण भारतातील अनेक ठिकाणी कमाल तापमान कायम दिसत आहे. तर उत्तर भारतात तापमानात घट होण्याची शक्यता आहे.

राज्यातील काही भागात सकाळी धुक्याची चादर दिसून येत आहे. तसेच सकाळी थंडीही वाढत आहे. किमान तापमानात अनेक भागात घट झाली. तर दुपारी जाणवत असलेला उकाडाही काही प्रमाणात कमी झाला आहे. राज्यात पुढील दोन दिवसांमध्ये तापमानात आणखी ३ ते ४ अंश सेल्सिअसची घट होऊ शकते, असा अंदाज हवामान विभागाने दिला.