Pune News: उत्तर भारतातील काही भागात थंडी वाढली आहे. मात्र राज्यातील थंडी आजही कमीच होती. दुपारी उन्हाचा चटकाही जाणवत आहे. राज्यात पुढील काही दिवस थंडी कमीच राहण्याचा अंदाज आहे. तर किमान तापमानातही चढ उतार राहू शकतात, असा अंदाज हवामान विभागाने दिला.

उत्तर भारतात काही ठिकाणी थंडीचा कडाका वाढला आहे. तर अनेक भागात सकाळी उशीरार्यंत दाट धुके दिसून येत आहे. आज राजस्थानातील फतेहपूर येथे देशाच्या सपाट भूभागावरील नीचांकी १ अंश सेल्सिअस तापमानाची नोंद झाली.

उत्तर भारतात थंडी कायम राहील, असा अंदाज हवामान विभागाने दिला. तर दक्षिण भारतातील ईशान्य मोसमी वाऱ्यांचा हंगाम सोमवारी (ता. २७) संपुष्टात आला. वायव्य भारतात १५० नॉट्स वेगाने पश्चिमेकडील जोरदार वाऱ्यांचे झोत कायम आहेत.

राज्यात उत्तर भारतातून येणारे थंड वाऱ्यांचे प्रवाह कमी झाले आहेत. त्याचा राज्यातील थंडीवर त्याचा परिणाम दिसत आहे. राज्यातील किमान तापमान १० अंशाच्या पुढेच आहे.

आज निफाड येथील गहू संशोधन केंद्रात १२.५ अंश सेल्सिअस तापमानाची नोंद झाली होती. राज्यात पुढील काही दिवस किमान तापमान जास्तच राहण्याचा अंदाज आहे. तर थंडीतही चढ उतार दिसून येतील, असा अंदाज हवामान विभागाने दिला.