Weather Foarcasting : पुणे : राज्यातील ढगाळ हवामान निवळू लागताच किमान तापमानात घट होऊ लागली आहे. पहाटेच्या वेळी काही प्रमाणात धुके आणि दव पडल्याची स्थिती कायम आहे.

विदर्भात किमान तापमानात घट झाल्याने गारठा वाढला आहे. उर्वरित राज्यातही गारठा हळूहळू वाढत जाण्याची शक्यता हवामान विभागाने वर्तविली आहे.

आग्नेय अरबी समुद्रात मालदीव बेटांजवळ समुद्रसपाटीपासून १.५ किलोमीटर उंचीवर चक्राकार वाऱ्यांची स्थिती कायम आहे. राज्यात आकाश निरभ्र होत असून, पहाटे गारठा तर दुपारी चटका अशी स्थिती अनुभवायला मिळत आहे.

तर कमी-अधिक प्रमाणात धुक्यासह दव पडल्याचे चित्र कायम आहे. राज्याच्या किमान तापमानात २ ते ३ अंशाची घट होण्याची शक्यता असल्याने थंडी हळूहळू वाढत जाणार आहे.

सोमवारी (ता. ११) सकाळपर्यंतच्या २४ तासांमध्ये रत्नागिरी येथे उच्चांकी ३५.६ अंश सेल्सिअस तापमान नोंदले गेले. राज्यात बुहतांश ठिकाणी कमाल तापमान २४ ते ३१ अंशांच्या दरम्यान होते. विदर्भात किमान तापमानाचा पारा १५ अंशांच्या खाली घसरला आहे. गोंदिया येथे राज्यातील नीचांकी १३ अंश सेल्सिअस किमान तापमानाची नोंद झाली.

सोमवारी (ता. ११) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :
पुणे ३१.० (१५.८), जळगाव ३०.० (१५.३), कोल्हापूर २९.६ (१९.५), महाबळेश्वर २४.६ (१५.५), नाशिक २९.८ (१६.२), निफाड २८.५ (१३.२), सांगली ३०.३ (१८.५), सातारा ३०.७ (१७.४), सोलापूर ३२.४(१७.८), सांताक्रूझ ३३.५ (२१.६), डहाणू ३०.७ (२०.२), रत्नागिरी ३५.६ (२३.१), छत्रपती संभाजीनगर २८.६ (१५.१), नांदेड २८.८ (१६.२), परभणी २८.९ (१५.१), अकोला २९.८ (१५.६), अमरावती २८.४ (१४.२), बुलडाणा २७.५ (१४.४), ब्रह्मपुरी २७.८ (१४.४), चंद्रपूर २८.४(१३.२), गडचिरोली २९.४ (१४.६), गोंदिया २७.० (१३.०), नागपूर २८.२(१३.८), वर्धा २८.९(१४.४), वाशीम २८.४ (१३.६), यवतमाळ ३०.५ (१४.५).