Pune News : बंगालच्या उपसागरातील ‘मिगजौम’ चक्रीवादळ निवळल्यानंतरही राज्यात ढगाळ हवामान आहे. गुरुवारी (ता. ७) पहाटे राज्याच्या अनेक भागांत दाट धुके पसरल्याचे दिसून आले. आज (ता. ८) राज्याच्या किमान व कमाल तापमानातील चढ-उतार होण्याची शक्यता कायम असल्याने हवामान विभागाने स्पष्ट केले.

बंगालच्या उपसागरातील ‘मिगजौम’ चक्रीवादळ निवळल्यानंतर विदर्भ आणि छत्तीसगड परिसरावर चक्राकार वारे वाहत आहेत. तर आग्नेय अरबी समुद्रात नव्याने चक्राकार वाऱ्यांची स्थिती तयार झाली आहे.

राज्यात दिवसभर ढगाळ हवामान व पहाटेपासूनच धुक्याची दुलई, दव पडल्याचे चित्र होते. अनेक भागांत सकाळी उशिरा सूर्यदर्शन झाले. ढगांच्या आच्छादनामुळे कमाल आणि किमान तापमानातील चढ-उतार कायम आहेत.

गुरुवारी (ता. ७) सकाळपर्यंतच्या २४ तासांमध्ये रत्नागिरी येथे उच्चांकी ३४.३ अंश सेल्सिअस तापमान नोंदले गेले. राज्यात बुहतांश ठिकाणी कमाल तापमान २२ ते ३४ अंशांच्या दरम्यान होते. किमान तापमानात चढ-उतार होत असून, जोरदार थंडीची प्रतीक्षा आहे. महाबळेश्‍वर येथे राज्यातील नीचांकी १३.६ अंश सेल्सिअस किमान तापमानाची नोंद झाली.

गुरुवारी (ता. ७) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) : पुणे २७.५ (१५.७), जळगाव २७.७ (१७.४), कोल्हापूर २९.१ (१९.९), महाबळेश्‍वर २२.२ (१३.६), नाशिक २५.७ (१६.८), निफाड २९.८ (१५.५), सांगली २७.७ (१८.८), सातारा २७.८ (१७.२), सोलापूर २५ (१९.२), सांताक्रूझ ३३.१ (२२.३), डहाणू ३३ (२४.४), रत्नागिरी ३४.३ (२३),

छत्रपती संभाजीनगर २३.३ (१८), नांदेड २५.८ (१८.८), परभणी २२.२ (१९.३), अकोला २५.७ (१९.७), अमरावती २२.८ (१७.७), बुलडाणा २३.४ (१८.४), ब्रह्मपुरी २२.६ (१८.६), चंद्रपूर २२.४ (१७), गडचिरोली २२.८ (१८.६), गोंदिया २१.७ (१७.६), नागपूर २२.१ (१८.९), वर्धा २२.९ (१८.९), वाशीम २६.८ (१७.२), यवतमाळ २२ (१८).