Pune News : मॉन्सूनने राज्य व्यापल्यानंतर कोकण, घाटमाथा, मध्य महाराष्ट्र आणि पूर्व विदर्भात तुरळक ठिकाणी पावसाच्या सरी कोसळत आहेत. राज्यात पावसाचा जोर काहीसा कमी होण्याची शक्यता असून, आज (ता. १९) कोकण, घाटमाथ्यावर पावसाच्या जोरदार सरींची शक्यता असल्याने दक्षतेचा इशारा (ऑरेंज अलर्ट) देण्यात आला आहे. मराठवाडा आणि विदर्भात विजांसह जोरदार पावसाची शक्यता असल्याने सतर्कतेचा इशारा (येलो अलर्ट) हवामान विभागाने दिला आहे.

बुधवारी (ता. १८) सकाळपर्यंतच्या २४ तासांमध्ये विदर्भातील ब्रह्मपुरी येथे राज्यातील उच्चांकी ३७ अंश तापमानाची नोंद झाली. कोकण, मध्य महाराष्ट्राच्या घाटमाथ्यावर पावसाचा जोर कमी झाला असला, तरी तुरळक ठिकाणी मध्यम ते जोरदार पाऊस कोसळत आहे. काही ठिकाणी अतिवृष्टीची नोंद झाली असून, साताऱ्यातील कोयना येथे उच्चांकी १३० मिलिमीटर पावसाची नोंद झाल्याचे हवामान विभागातर्फे सांगण्यात आले.

आज (ता. १९) रायगड, रत्नागिरी, सिंधुदुर्ग, पुणे घाटमाथा, सातारा जिल्ह्यांच्या घाटमाथ्यावर जोरदार पावसाची शक्यता असल्याने दक्षतेचा इशारा (ऑरेंज अलर्ट) आहे. पालघर, ठाणे, मुंबई, सिंधुदुर्ग, नाशिक घाटमाथा, कोल्हापूर जिल्ह्यांच्या घाटमाथ्यावर जोरदार पावसाचा अंदाज, मराठवाडा आणि विदर्भात विजांसह वादळी पावसाची शक्यता असल्याने सतर्कतेचा इशारा (येलो अलर्ट) देण्यात आला आहे. उर्वरित राज्यात तुरळक ठिकाणी हलक्या पावसाची शक्यता आहे.

कमी दाबाचे क्षेत्र कायम

गुजरात आणि परिसरावरील कमी दाबाचे क्षेत्र राजस्थानकडे सरकले आहे. तर पश्‍चिम बंगाल आणि परिसरावरील कमी दाबाच्या क्षेत्राची तीव्रता वाढली आहे. ही प्रणाली वायव्येकडे सरकत असून, झारखंडकडे येण्याची शक्यता आहे. या कमी दाब क्षेत्रांमुळे गुजरात महाराष्ट्रासह पश्चिम किनारपट्टी आणि पूर्व भारतात ढग जमा झाले असून, पावसाला पोषक हवामान आहे.

मॉन्सूनची चाल सुरूच

नैॡत्य मोसमी वाऱ्यांनी (मॉन्सून) प्रवास पुन्हा सुरू झाल्यानंतर वेग धरला आहे. बुधवारी (ता. १८) मॉन्सूनने संपूर्ण गुजरात, छत्तीसगड, झारखंडसह, मध्य प्रदेश, बिहारचा आणखी काही भाग, राजस्थान आणि पूर्व उत्तर प्रदेशच्या काही भागात प्रगती केली आहे. दोन दिवसांत मॉन्सूनची आणखी प्रगती होणार असल्याचे हवामान विभागाने म्हटले आहे.

बुधवारी (ता. १८) सकाळी ८.३० वाजेपर्यंतच्या २४ तासांमध्ये नोंदले गेलेले तापमान. (अंश सेल्सिअसमध्ये)

‎---

‎ठिकाणे---तापमान कमाल---तापमान किमान

‎पुणे---२९.८---२३.१

अहिल्यानगर---निरंक---२३.४

‎‎धुळे---३६.०---२२.५

जळगाव---३६.६---२४.७

जेऊर---३४.०---२०.५

‎‎कोल्हापूर---२९.०---२२.७

‎महाबळेश्‍वर---२०.५---१८.५

मालेगाव---३३.६---२२.६

‎‎नाशिक---३०.०---२३.२

‎निफाड---३०.२---२३.१

‎सांगली---३०.२---२३.३

‎सातारा---२८.०---२२.८

‎सोलापूर---३३.८---२३.९

‎सांताक्रूझ---३२.६---२६.१

डहाणू---३२.९---२५.४

‎रत्नागिरी---३१.२---२६.७

‎छत्रपती संभाजीनगर---३२.६---२३.८

‎धाराशिव---२९.८---२१.७

‎परभणी---३५.०---२४.०

परभणी (कृषी)---३५.०---२२.६

‎‎अकोला---३६.४---२६.५

अमरावती---३५.२---२३.९

‎भंडारा---३५.०---२४.०‎‎

बुलडाणा---३३.६---२३.४

‎ब्रह्मपुरी---३७.०---२६.६

‎चंद्रपूर---३६.०---२७.०

‎गडचिरोली---३४.०---२६.०

‎गोंदिया---३३.६---२४.८

नागपूर---३८.२---२८.२

‎वर्धा---३५.९---२६.५

‎वाशीम---३४.८---२४.८

‎यवतमाळ---३६.४---२३.४

जोरदार पावसाचा इशारा (ऑरेंज अलर्ट) :

रायगड, रत्नागिरी, सिंधुदुर्ग, पुणे घाटमाथा, सातारा घाटमाथा.

जोरदार पावसाचा इशारा (येलो अलर्ट) :

पालघर, ठाणे, मुंबई, सिंधुदुर्ग, नाशिक घाटमाथा, कोल्हापूर घाटमाथा.

विजांसह वादळी पावसाची शक्यता (येलो अलर्ट) :

छत्रपती संभाजीनगर, जालना, परभणी, हिंगोली, नांदेड, बुलडाणा, अकोला, अमरावती, वाशीम, यवतमाळ, वर्धा, नागपूर, गोंदिया, भंडारा, चंद्रपूर, गडचिरोली.