Pune News : राज्यात थंडीचा कडाका कायम असताना उत्तर भारतात मात्र किमान तापमानात काहीशी घट झाली. राज्यातील अनेक भागात किमान आणि कमाल तापमान सरासरीपेक्षा जास्त दिसते. तर पुढील काही दिवस राज्यातही थंडीचा कडाका जाणवेल, असा अंदाज हवामान विभागाने दिला.

राज्यात थंडी कायम आहे. काही भागात किमान तापमान सरासरीपेक्षा कमी झाले. मात्र आजही अनेक भागातील किमान तापमान सरासरीपेक्षा जास्त आहे. म्हणजेच या काळात एरवी जाणवत असलेल्या थंडीच्या तुलनेत सध्या गारठा कमी आहे.

कमाल तापमानाची स्थिती अशीच आहे. काही भागात कमाल तापमान सरासरीपेक्षा कमी तर काही भागात जास्त जाणवते. राज्यात पुढील पाचही दिवस हवामान कोरडे राहण्याचा अंदाज आहे. त्यामुळे थंडीही कायम राहील, असा अंदाज आहे.

पंजाब, हरियाना, चंदीगड, दिल्ली, वायव्य राजस्थान, पूर्व उत्तर प्रदेश, दक्षिण राजस्थान, मध्य प्रदेश, छत्तीसगड, झारखंड आणि ओडिशाच्या अनेक भागात सरासरी किमान तापमान ६ अंश सेल्सिअस ते १२ अंश सेल्सिअसच्या दरम्यान आहे.

तसेच या राज्यांमध्ये काही भागात धुक्याची चादरही सकाळच्या वातावरणात दिसून येत आहे. उत्तरेकडून थंड वारे राज्याच्या दिशेने येत आहे. यामुळे राज्यात थंडी वाढली.