फळझाडे आणि भाजीपाला पिकांमध्ये फळधारणा न होण्याची समस्या अनेक ठिकाणी आढळते. झाडांची वाढ चांगली होत असली तरी फळे लागत नाहीत, यामुळे उत्पादन घटते. टोमॅटो, वांगी यांसारख्या पिकांसाठी योग्य तापमान गरजेचे असते. तापमान खूप जास्त किंवा कमी असल्यास फळधारणा होत नाही. झाडांना फुले आणि फळधारणा होण्यासाठी अन्नद्रव्ये आणि पाणी आवश्यक असते. वेलवर्गीय पिकांमध्ये नर आणि मादी फुले वेगवेगळ्या वेळी येतात, त्यामुळे परपरागीकरण गरजेचे असते. मधमाशा आणि फुलपाखरांच्या अनुपस्थितीत फळधारणा कमी होते. सूर्यप्रकाशाचा अभाव, विशिष्ट तापमानाचा दोष, तसेच जास्त कीटकनाशक वापरामुळे मधमाशांची संख्या घटते, परिणामी परपरागीकरण कमी होते. काही किडी व रोगांमुळेही फळधारणा होत नाही. झाडांमध्ये संजीवकांची कमतरता असेल तर फुले आणि फळे गळतात. तसेच अयोग्य किंवा जास्त प्रमाणात रसायनांचा वापरही फळधारणेवर परिणाम करतो. त्यामुळे ही कारणे ओळखून योग्य वेळी उपाययोजना केल्यास उत्पादनातील घट टाळता येते.