भारत हळद उत्पादनात आघाडीवर असून, जागतिक उत्पादनाच्या ८० टक्के हळद भारतात उत्पादित होते. देशात यंदा ११ लाख १६ हजार टन उत्पादन होण्याचा अंदाज आहे, ज्यामध्ये महाराष्ट्र, कर्नाटक, तमिळनाडू आणि तेलंगणाचा मोठा वाटा आहे. सध्या बाजारात हळदीची आवक वाढत असून, विशेषतः तेलंगणात भाव १० हजार रुपयांखाली गेले आहेत. आंध्र प्रदेश व तमिळनाडूतही दरात घसरण दिसून आली आहे. मागील महिन्यात १५ हजारांपर्यंत असलेले दर आता ११ ते १३ हजारांच्या दरम्यान आहेत. महाराष्ट्रातील सांगली, वाई, वसमत आणि वाशीम बाजारांमध्येही हळदीच्या दरावर दबाव जाणवत आहे. महिनाभरातच हळदीचे दर २ ते ३ हजार रुपयांनी घटले आहेत. बाजारात आवक आणखी वाढण्याची शक्यता असल्याने दर पुढेही दबावात राहू शकतात.