banana price: केळीच्या भावात मागील काही दिवसांपासून नरमाई दिसून येत आहे. केळीची बाजारातील आवक कमीच आहे. सध्या केळीला सरासरी १५०० ते १८०० रुपयांचा भाव मिळत आहे. तुरीचे बाजारभाव मागील काही आठवड्यांपासून दबावात आले आहेत. सरकारची तूर खरेदी बंद झाल्यानंतर दर हमीभावापेक्षा एक हजार रुपयांपर्यंत कमी झाले. सध्या तुरीला बाजारात ६ हजार ५०० ते ६ हजार ८०० रुपयांच्या दरम्यान भाव मिळत आहे. डाळिंबाला बाजारात सध्या चांगला उठाव आहे. बाजारातील कमी आवक आणि चांगला उठाव यामुळे डाळिंबाचे दर तेजीतच आहेत.सध्या बाजारात डाळिंबाला प्रतिक्विंटल सरासरी ८ हजार ते ९ हजार रुपयांच्या दरम्यान भाव मिळत आहे. हळदीचे दर मागील काही आठवड्यांपासून स्थिर आहेत. बाजारातील हळदीची आवकही काहीसी मंदावली आहे. सध्या हळद १२ हजार ते १३ हजार रुपये प्रतिक्विंटलच्या दरम्यान विकली जात आहे. बाजारातील शेवग्याची आवक कमीच आहे. त्यामुळे शेवग्याचे भावही तेजीतच आहेत. शेवगा आजही ५ हजार ते ६ हजार रुपये प्रतिक्विंटलच्या दरम्यान विकला गेला.