rain red alert: देशात मान्सूनची वाटचाल वेगाने सुरू असून महाराष्ट्रात तो यंदा ११ दिवस आधीच दाखल झाला आहे. आज मान्सूनने मुंबई, पुणे आणि सोलापूरसह राज्याच्या आणखी काही भागात प्रवेश केला. यामुळे मुंबई व पुण्यात मुसळधार पावसाने जनजीवन विस्कळीत केले आहे. हवामान विभागाने पुढील पाच दिवसांत काही भागांत जोरदार पावसाचा इशारा दिला आहे. काल महाराष्ट्रात आगमन केल्यानंतर मान्सूनने आज मुंबईपर्यंत मजल मारली. राज्यासह बंगळूरू, कर्नाटकमधील काही भाग, संपूर्ण तामिळनाडू, मिझोराम, त्रिपुरा, मणिपूर, नागालॅंड, अरुणाचल प्रदेश तसेच तेलंगणा, आंध्र प्रदेश, बंगालचा उपसागर, आसाम आणि मेघालयाच्या काही भागांत मान्सूनने विस्तार केला आहे. राज्यात कोकण आणि मध्य महाराष्ट्रात पावसाचा जोर अधिक असून, हवामान विभागाने सहा जिल्ह्यांसाठी रेड अलर्ट जारी केला आहे. ठाणे, मुंबई, रायगड, रत्नागिरी, पुण्याचा घाटमाथा व सातारा जिल्ह्यांत अतिवृष्टीचा इशारा आहे. उद्याही रत्नागिरी, सिंधुदुर्ग, सातारा आणि कोल्हापूरसाठी रेड अलर्ट दिला आहे.