राज्यात वादळी पावसाचे वातावरण कायम आहे. आज बहुतांश जिल्ह्यांमध्ये विजांसह हलक्या ते मध्यम पावसाची शक्यता आहे. मध्य महाराष्ट्र आणि मराठवाड्यात काही ठिकाणी गारपीट होण्याचा इशारा हवामान विभागाने दिला आहे. पुणे, सातारा, सांगली, बीड, लातूर, धाराशिव येथे विजांचा कडकडाट आणि जोरदार वाऱ्यासह गारपीट होऊ शकते. वेगाने वाहणाऱ्या वाऱ्याचा वेग ५० ते ६० किमी प्रतितास राहण्याचा अंदाज आहे. विदर्भातील अमरावती, अकोला, चंद्रपूर आणि गडचिरोली येथे पुढील काही दिवस गारपीट होण्याची शक्यता आहे. कोकणात आज आणि उद्या काही ठिकाणी हलक्या ते मध्यम पावसाचा अंदाज आहे. सिंधुदुर्ग जिल्ह्यात पुढील ५ दिवस पावसाचा इशारा देण्यात आला आहे. धुळे, नंदूरबार, जळगाव, नाशिक येथे गुरुवार आणि शुक्रवारी वादळी पाऊस होऊ शकतो. मराठवाड्यात छत्रपती संभाजीनगर, जालना, परभणी, नांदेड येथे पुढील ३ दिवस पाऊस पडण्याचा अंदाज आहे. विदर्भातील बुलडाणा, गोंदीया, नागपूर, वर्धा, वाशिम, यवतमाळ जिल्ह्यातही विजांसह पाऊस पडण्याची शक्यता हवामान विभागाने वर्तवली आहे.