मागील तीन वर्षांपासून सोयाबीनचे दर कमीच मिळत आहेत. यंदाही परिस्थिती वेगळी नाही. यंदा तर हमीभावापेक्षा १० ते २० टक्के कमी भाव मिळाला. त्याच वेळी मका आणि ऊस पिकांमधून तुलनेने चांगला परतावा मिळाल्यामुळे २०२५ च्या खरीप हंगामात शेतकरी सोयाबीनची लागवड कमी करतील, अशी शक्यता वर्तवली जात आहे. त्यामुळे अनेक शेतकरी आता सोयाबीनऐवजी मका व ऊस या पिकांकडे वळण्याचा विचार करत आहेत. खरीप हंगामात देशातील एक महत्त्वाचे पीक म्हणून सोयाबीनकडे पाहिले जाते. मात्र, यावर्षी लागवड कमी होण्याची शक्यता आहे. त्यामुळे भारतात खाद्यतेलाच्या आयातीत वाढ होण्याची शक्यता आहे, असे राजेंद्र जाधव यांनी राॅयटर्समध्ये लिहिलेल्या वृत्तात म्हटले आहे. सोयाबीन हे प्रामुख्याने कोरडवाहू क्षेत्रातील पीक असून मध्य प्रदेश, महाराष्ट्र, राजस्थान, आंध्र प्रदेश आणि कर्नाटक ही प्रमुख उत्पादक राज्ये आहेत.