Soybean Production: अमेरिका आणि चीनमध्ये सुरु असलेल्या व्यापार युध्दाला सोमवारी ९० दिवसांसाठी विराम मिळाला. अमेरिकेने चीनमधून आयात होणाऱ्या मालावर १४५ टक्क्यांऐवजी ३० टक्के शुल्क आकारण्याचा निर्णय घेतला. तर चीनने आमेरिकेतून आयात होणाऱ्या मालावर १२५ टक्क्यांऐवजी १० टक्के शुल्क लागू केले. हे शुल्क ९० दिवसांसाठी असेल. जगातील दुसऱ्या क्रमांकाच्या सोयाबीन निर्यातदार अमेरिका आणि सर्वात मोठ्या आयातदार चीनमध्ये तोडगा निघाल्याने आंतरराष्ट्रीय बाजारात सकारात्मक वातावरण दिसून आले. आता चीन अमेरिकेकडून जास्त सोयाबीन खरेदी करेल असे वातावरण तयार झाल्याने सोयाबीन, सोयातेल आणि सोयापेंडच्या दरात सुधारणा दिसून आली. मात्र दर सुधारणेवर मर्यादाही आहेत.चीनच्या बाजारात अमेरिकेच्या सोयाबीनला ब्राझीलच्या सोयाबीनशी स्पर्धा करावी लागत आहे. चीनने आता अमेरिकेच्या सोयाबीनवर १० टक्के आयात शुल्क लावले. मात्र ब्राझीलच्या सोयाबीनवर आयात शुल्क नाही. त्यामुळे ब्राझीलचे सोयाबीन स्वस्त पडत आहे. तसेच ब्राझीलमध्ये यंदा विक्रमी सोयाबीन उत्पादन झाले आणि पुरवाठाही चांगला आहे. तसेच ब्राझीलच्या सोयाबीनच्या किमतीही कमी आहेत. चीनन आतापर्यंत गरजेच्या ७० टक्के सोयाबीन ब्राझीलमधून घेतले आहे. अमेरिकेच्या सोयाबीनवर चीनमध्ये शुल्क असल्याचा फटका शेतकऱ्यांना बसणार आहे, अशी भीती अमेरिकेच्या शेतकऱ्यांनी व्यक्त केली.