सरकारच्या धोरणामुळे हरभरा बाजारावरील दबाव कायम आहे. आज बाजारात हरभरा ५ हजार ते ५ हजार ४०० रुपयांच्या दरम्यान विकला गेला. राज्यातील सर्वच बाजारांमध्ये आल्याची आवक वाढली आहे. सध्या बाजारात आल्याला प्रतिक्विंटल सरासरी २ हजार ते ३ हजारांच्या दरम्यान भाव मिळत आहे. लग्नसराई आणि सण समारंभामुळे बेदाण्याला चांगली मागणी आहे. नव्या बेदाण्याला प्रति किलोस १०० ते २५० रुपये दर मिळत आहे. आंतरराष्ट्रीय बाजारात सोयाबीन आणि सोयापेंडच्या दरातील चढ उतार सुरुच आहेत. सीबाॅटवर सोयाबीनचे वायदे आज दुपारपर्यंत ९.७६ डाॅलर प्रतिबुशेल्सवर बंद झाले. तर सोयापेंड २८५ डाॅलर प्रतिटनांवर बंद झाले होते. देशात प्रक्रिया प्लांट्सचे सोयाबीन खरेदीचे भाव ४ हजार ४०० ते ४ हजार ५५० रुपयांवर होते. तर बाजार समित्यांमध्ये सोयाबीनला सरासरी ४ हजार ते ४ हजार ३०० रुपयांचा भाव मिळत आहे. आंतरराष्ट्रीय बाजारात कापसाच्या भावात चढ उतार सुरुच आहे. आंतरराष्ट्रीय बाजारात कापसाचे भाव आज दुपारपर्यंत ६३ सेंट प्रतिपाऊंडवर होते. सध्या बाजारात कापसाला सरासरी ७ हजार १०० ते ७ हजार ७०० रुपयांच्या दरम्यान भाव मिळत आहे.