monsoon break: आज सलग तिसऱ्या दिवशी मॉन्सूनने एकाच भागात मुक्काम केला. सध्या मॉन्सूनची सीमा मुंबई, अहिल्यानगर, आदीलाबाद, भवानीपटना, पुरी आणि बालूरघाट या भागांपर्यंत पोहोचली आहे. जरी हवामान पोषक असले तरी मॉन्सूनची पुढील वाटचाल पश्चिम बंगाल आणि ओडिशाच्या काही भागांमध्ये येत्या दोन दिवसांतच होण्याची शक्यता हवामान विभागाने व्यक्त केली आहे. ६ ते १२ जूनपर्यंत देशाच्या बहुतांश भागात पाऊस दडी मारण्याची शक्यता असल्याचे हवामान विभागाने म्हटले आहे. महाराष्ट्राचा विचार करता ३१ मे ते ५ जून या कालावधीत कोकण, विदर्भात सरासरीपेक्षा अधिक, मध्य महाराष्ट्रात सरासरीइतका तर मराठवाड्यात सरासरीपेक्षा कमी पाऊस पडण्याची शक्यता आहे. ६ ते १२ जून या कालावधीत देशाच्या बहुतांश भागात पावसात खंड पडणार असून, कोकण, मध्य महाराष्ट्रात पावसात तूट पडणार आहे. तर मराठवाडा आणि विदर्भातही सरासरीपेक्षा कमी पावसाचा अंदाज हवामान विभागाने वर्तविला आहे.