Maharashtra rain update: यंदा मॉन्सूनने राज्यात अपेक्षेपेक्षा लवकर हजेरी लावली. २६ मे रोजीच राज्याच्या निम्म्याहून अधिक भागात मॉन्सून पोहोचला होता. मात्र त्यानंतर जवळपास २० दिवस मॉन्सून स्थिरावला होता कारण हवामान अनुकूल नव्हते. त्यामुळे पावसात खंड पडला होता. मात्र १४ जूनपासून हवामान पोषक बनत गेल्यामुळे पुन्हा पावसाला सुरूवात झाली आहे. कोकण, मध्य महाराष्ट्र, मराठवाडा आणि विदर्भातील अनेक भागांत दमदार पावसाच्या सरी झाल्या. आज आणि उद्या कोकणात काही भागात जोरदार पावसाचा इशारा देण्यात आला आहे. रायगड, पुणे व सातारा जिल्ह्यांच्या घाटमाथ्यावर अतिजोरदार पावसाचा रेड अलर्ट देण्यात आला आहे. सिंधुदुर्ग, रत्नागिरी, ठाणे, पालघर, मुंबई, अमरावती, नागपूर, भंडारा आणि गोंदिया जिल्ह्यांमध्ये जोरदार ते अतिजोरदार पावसाचा ऑरेंज अलर्ट आहे.