माॅन्सूनची आजही राज्यात कोणतीही प्रगती झालेली नाही. मागील दोन दिवसांप्रमाणेच माॅन्सून एका ठिकाणीच थांबलेला आहे. मात्र, राज्यातील काही भागांमध्ये पावसाची शक्यता हवामान विभागाने वर्तवली आहे. विशेषतः विदर्भात पुढील पाच दिवस पावसाचा जोर काहीसा अधिक राहण्याचा अंदाज व्यक्त करण्यात आला आहे. राज्यात कालपासून पावसाचा जोर काहीसा कमी झालेला आहे. अनेक भागांमध्ये हलक्या सरी पडल्या, तर काही ठिकाणी पावसाने उघडीप दिली. मध्य महाराष्ट्र, मराठवाडा आणि कोकणात पावसाची तीव्रता थोडी कमी झालेली आहे. पुढील पाच दिवसांत, विदर्भ वगळता इतर भागांमध्ये पावसाचा जोर कमीच राहण्याची शक्यता आहे. हवामान विभागाने पुढील पाच दिवसांसाठी राज्यातील काही भागांमध्ये पावसाचा अंदाज वर्तवला आहे. विशेषतः विदर्भातील जिल्ह्यांमध्ये काही ठिकाणी जोरदार पावसाचा येलो अलर्ट जारी करण्यात आला आहे. कोकणातही पावसाचा जोर मर्यादित राहील, पण सिंधुदुर्ग आणि रत्नागिरी जिल्ह्यांमध्ये काही भागांत जोरदार पावसाची शक्यता हवामान विभागाने वर्तवली आहे.