राज्यात तापमानात मोठी वाढ झाली असून अकोल्यात आजही सर्वाधिक ४४.१ अंश सेल्सिअस तापमानाची नोंद झाली. अमरावतीत ४३ अंश तापमान होते. विदर्भातील अनेक भागांमध्ये ४० अंशाच्या वर तापमान आहे. दरम्यान, मराठवाडा, विदर्भ आणि दक्षिण महाराष्ट्रातील काही भागांत अवकाळी पावसाचा अंदाज हवामान विभागाने वर्तवला आहे. कोकणातील मुंबई, ठाणे, पालघर, रायगड, रत्नागिरी आणि सिंधुदुर्ग जिल्ह्यांत उष्ण आणि दमट हवामान राहण्याचा अंदाज आहे. शुक्रवारपासून मात्र हवामान कोरडे राहील. कोल्हापूर, सातारा, सोलापूर आणि सांगलीमध्ये विजांसह हलक्या ते मध्यम पावसाची शक्यता आहे. बीडमध्ये आज, तर परभणी, लातूर, धाराशिव आणि नांदेडमध्ये उद्या आणि शुक्रवारी पावसाचा अंदाज आहे. अमरावती, गडचिरोली, गोंदीया, भंडारा, वाशीम, यवतमाळ आणि चंद्रपूर या जिल्ह्यांमध्ये पुढील काही दिवसांत विजांसह पावसाची शक्यता हवामान विभागाने वर्तवली आहे.