Southwest monsoon: मान्सून यंदा अपेक्षेपेक्षा एक दिवस आधी आणि सरासरी वेळेपेक्षा तब्बल आठ दिवस आधी आज सकाळी केरळमध्ये दाखल झाला. मान्सूनने संपूर्ण केरळ व्यापले असून, तमिळनाडूच्या बहुतांश भागात आणि कर्नाटकाच्या काही भागांपर्यंत पोहोचला आहे. आता मान्सून गोव्याच्या सीमेलगत आला असून, पुढील २ ते ३ दिवसांत तो महाराष्ट्रातही पोहोचेल, असा हवामान विभागाचा अंदाज आहे. दोन दिवसांच्या विश्रांतीनंतर मान्सूनने पुन्हा जोर पकडत आज मोठी झेप घेतली. केरळसह तमिळनाडूचा बहुतांश भाग, कर्नाटकाचा काही भाग, संपूर्ण दक्षिण अरबी समुद्र, लक्षद्वीप बेटे, पूर्व-मध्य आणि उत्तर बंगालच्या उपसागराचा काही भाग, तसेच मिझोरामच्या काही भागांत मान्सून दाखल झाला आहे. सध्या मान्सूनची सीमा कर्नाटकमधील करवार व सिमोगा, तमिळनाडूमधील धर्मपुरी व चेन्नई आणि मिझोराममधील सैहा या भागांपर्यंत पोहोचली आहे.