पोषक हवामान असल्याने माॅन्सूनने आज आणखी काही भागात प्रगती केली. माॅन्सूनने आग्नेय अरबी समुद्राचा आणखी काही भाग, मालदीव आणि कोमोरिनचा भाग तसेच दक्षिण बंगालच्या उपसागरचा आणखी काही भाग तसेच अंदमान आणि अंदमान समुद्राच्या आणखी काही भागात माॅन्सूनने प्रगती केली. माॅन्सून आता श्रीलंकेच्या किनाऱ्यापर्यंत पोचला आहे. माॅन्सूनच्या वाटचालीसाठी पोषक हवामान आहे. त्यामुळे पुढील ३ ते ४ दिवसांत माॅन्सून दक्षिण अरबी समुद्राच्या आणखी काही भागात, मालदीव आणि कोमोरीनचा भाग, दक्षिण बंगालचा उपसागर, अंदमानाच उर्वरित भाग आणि मध्य बंगालच्या उपसागराचा उरलेला भाग माॅन्सून काबीज करेल, असा अंदाज हवामान विभागाने दिला. राज्यातील काही भागात पुढील ५ दिवस वादळी पावसाचा अंदाज आहे. विदर्भ, मराठवाडा, मध्य महाराष्ट्र आणि कोकणातही पावसासाठी पोषक हवामान आहे. विदर्भातील बुलडाणा, अकोला, अमरावती, वाशीम, यवतमाळ, वर्धा, नागपूर, गडचिरोली, भंडारा, गोंदीया, चंद्रपूर जिल्ह्यात काही भागात विजा आणि ढगांच्या गडगडाटासह हलक्या वादळी पावसाचा अंदाज आहे.