राज्यात एप्रिलच्या दुसऱ्या आठवड्यात उन्हाने आग ओकायला सुरूवात केली आहे. तर सिंचन प्रकल्पातील पाणीसाठ्यात झपाट्याने घट होऊ लागली आहे. मागील वर्षीच्या मॉन्सून हंगामात पावसाने साथ दिल्याने आगामी मॉन्सूनच्या हंगामाबद्दल शेतकऱ्यांना आतुरता लागली आहे. भारतीय हवामानशास्त्र विभाग लवकरच मॉन्सूनचा अधिकृत अंदाज जाहीर करेल, अशी शक्यता आहे. आत्ता मात्र स्कायमेटने मॉन्सून हंगामात सरासरी १०३ टक्के पावसाचा अंदाज व्यक्त केला आहे. त्यामुळे यंदाही मॉन्सून हंगामात पाऊस शेतकऱ्यांना साथ देण्याची शक्यता वर्तवली जात आहे. स्कायमेटच्या अंदाजानुसार देशाच्या पश्चिम आणि दक्षिण भागात चांगल्या मॉन्सून बरसण्याची शक्यता आहे. तसेच महाराष्ट्र आणि मध्यप्रदेशात पुरेसा तर पश्चिम घाट केरळ, कर्नाटक किनारपट्टीचा भाग आणि गोव्यात सरासरीपेक्षा अधिक पाऊस राहील. तसेच उत्तरेकडील राज्य आणि पर्वतीय भागात मात्र सरासरीपेक्षा कमी पाऊस होईल, असा अंदाज स्कायमेटने वर्तवला आहे.