राज्यात ढगाळ हवामानामुळे तापमानात घट झाली असून, आजही अनेक ठिकाणी अंशतः ढगाळ वातावरण होते. हवामान विभागाने आज आणि उद्या काही भागांत हलक्या पावसाचा अंदाज व्यक्त केला आहे. सांगली, सोलापूर, छत्रपती संभाजीनगर, जालना, परभणी, बीड, हिंगोली जिल्ह्यांमध्ये काही ठिकाणी ढगांच्या गडगडाटासह पाऊस होण्याची शक्यता आहे. नांदेड, लातूर, धाराशिव, चंद्रपूर, गडचिरोली आणि गोंदीया जिल्ह्यांसाठी विजांसह हलक्या ते मध्यम पावसाचा येलो अलर्ट जारी करण्यात आला आहे. मराठवाडा आणि विदर्भातील काही भागात ढगाळ वातावरण कायम राहण्याची शक्यता आहे. उद्या सोलापूर, नांदेड, लातूर आणि धाराशिव जिल्ह्यांतही हलक्या पावसाचा अंदाज आहे. सोमवारपासून पावसाळी वातावरण निवळेल आणि तापमान वाढण्याची शक्यता आहे. मागील तीन दिवसांपासून ढगाळ हवामानामुळे उन्हाचा चटका काहीसा कमी झाला होता. राज्यातील तापमान सरासरी ३७ ते ३८ अंशांदरम्यान राहिले असून, पुढील काही दिवस चढ-उतार सुरू राहणार असल्याचा अंदाज हवामान विभागाने व्यक्त केला आहे.