देशातील अनेक भागात गव्हाची काढणी सुरू असून, बाजारात नवा गहू विक्रीसाठी येत आहे. सध्या गव्हाचे दर २,५०० ते २,७०० रुपयांच्या दरम्यान असून, पुढील आठवड्यात आवक वाढल्यास किंमतीत नरमाई येऊ शकते. आल्याच्या उत्पादनात वाढ झाल्याने त्याचे दर १०,००० वरून ३,००० रुपयांपर्यंत घसरले आहेत. लिंबाची मर्यादित आवक आणि वाढती मागणी यामुळे त्याच्या दरात सुधारणा दिसून येत आहे. सोयाबीनचा पुरवठा चांगला असून, उठाव कमी असल्याने दर ३,७०० ते ४,००० रुपयांदरम्यान आहेत. आंतरराष्ट्रीय बाजारातील मंदीमुळे देशातील सोयाबीनच्या दरावरही परिणाम होत आहे. कापसाच्या आवकेत घट होत असून, दर ६,८०० ते ७,२०० रुपयांच्या दरम्यान आहेत. पुढील आठवड्यांत कापसाच्या दरात वाढ होण्याची शक्यता आहे.