Animal Diseases: पुराचे पाणी साठल्यामुळे काही ठिकाणी डास,किटकांचा प्रादुर्भाव होतो त्यामुळे कडुलिंबाचा पाला व शेणाच्या गोवऱ्या पेटवून धूर करावा. गोठ्यात जनावरांची गर्दी टाळावी. गर्दीमुळे एका जनावरांपासून दुसऱ्या जनावरांमध्ये आजाराचे संक्रमण वाढेल. पूरामुळे जनावरांमध्ये जंत, गोचीड, गोमाशा यासारख्या परोपजीवींचा प्रादुर्भाव वाढतो. त्यामुळे सर्व जनावरांचे जंतनिर्मूलन आणि गोचीड निर्मूलन करून घ्यावे. गोठ्यातील सर्व जनावरांची व्यवस्थित पाहणी करून आजारी जनावरांना पशुवैद्यकाकडून उपचार करून घ्यावेत. जनावरांना आहारातून खनिज मिश्रणे, हिरवा आणि वाळलेला चारा द्यावा. या काळात गाभण जनावरांची जास्तीत जास्त काळजी घ्यावी. त्यांना कोणत्याही प्रकारचा ताण टाळण्यासाठी आवश्यक व्यवस्था करावी.