Weather Update:  शुक्रवारी (ता. २३) सकाळपर्यंतच्या २४ तासांमध्ये ब्रह्मपूरी येथे उच्चांकी ३५.६ अंश तापमानाची नोंद झाली. राज्यात अनेक ठिकाणी तापमान ३४ अंशांच्या वर आहे. ढगाळ हवामानामुळे उकाड्यातील वाढ कायम आहे. राज्यात अनेक ठिकाणी जोरदार पावसाने हजेरी लावली आहे. आज (ता. २४) राज्यात पावसाचा जोर वाढणार असून, कोकणातील पालघर, ठाणे, मुंबई, रायगड, रत्नागिरी, मध्य महाराष्ट्रातील पुणे, सातारा, विदर्भातील अमरावती, भंडारा, गोंदिया, चंद्रपूर या जिल्ह्यात जोरदार पावसाचा इशारा (ऑरेंज अलर्ट) आहे. मध्य महाराष्ट्र, मराठवाडा आणि विदर्भात तुरळक ठिकाणी जोरदार पावसाचा इशारा (यलो अलर्ट) आहे, तर उर्वरित राज्यात पावसाच्या हलक्या ते मध्यम सरींची शक्यता हवामान विभागाने वर्तविली आहे.