rain alert: मान्सूनच्या पुढील वाटचालीसाठी वातावरण पोषक असल्यामुळे, पुढील २ ते ३ दिवसांत मान्सून महाराष्ट्रात आणखी काही भागांत प्रगती करेल. कर्नाटकाचा उर्वरित भाग, तेलंगणा आणि आंध्र प्रदेशातही मान्सून पुढे सरकेल. बंगालच्या उपसागरातील शिल्लक भाग, ईशान्य भारतातील काही राज्ये, तसेच पश्चिम बंगाल व सिक्कीमच्या काही भागांमध्ये देखील याच कालावधीत मान्सून पोहोचेल, असा अंदाज हवामान विभागाने वर्तवला आहे. राज्यातील अनेक भागांत पुढील पाच दिवस जोरदार पावसाचा इशारा देण्यात आला आहे. आज रत्नागिरी, सिंधुदुर्ग, सातारा घाटमाथा आणि कोल्हापूर जिल्ह्यांमध्ये काही ठिकाणी अतिजोरदार पावसाचा रेड अलर्ट जाहीर करण्यात आला आहे. रायगड, पुणे, चंद्रपूर, गडचिरोली आणि गोंदिया जिल्ह्यांमध्ये जोरदार ते अतिजोरदार पावसाचा ऑरेंज अलर्ट देण्यात आला आहे.