मॉन्सूनची आज कोणतीही पुढील वाटचाल झाली नाही. मॉन्सून सध्या त्याच भागात स्थिर आहे. मात्र, मॉन्सूनच्या प्रगतीसाठी हवामान पूरक असून, येत्या २ ते ३ दिवसांत मॉन्सूनची वेगाने वाटचाल होण्याची शक्यता हवामान विभागाने व्यक्त केली आहे. मॉन्सून रविवारीपर्यंत केरळपर्यंत पोहोचेल, असा अंदाज वर्तवण्यात आला आहे. पुढील काही दिवसांत मॉन्सून दक्षिण अरबी समुद्राच्या आणखी काही भागांवर प्रगती करेल. तसेच, मॉन्सून मालदीव आणि कोमोरिनच्या उर्वरित भागात प्रवेश करेल आणि त्याचबरोबर लक्षद्वीप, केरळ, तमिळनाडू व ईशान्य भारताच्या काही भागांमध्येही दाखल होईल. बंगालच्या उपसागरातील आणखी काही भागातही मॉन्सूनचा विस्तार होण्याचा अंदाज आहे. पूर्व-मध्य अरबी समुद्रात कोकण व गोव्याच्या किनारपट्टीवर कमी दाबाचा पट्टा तयार झाला असून, तो पुढील ३६ तासांत उत्तरेकडे सरकण्याची शक्यता आहे. त्याची तीव्रता वाढण्याचा अंदाजही हवामान विभागाने व्यक्त केला आहे. राज्यात अनेक ठिकाणी पावसासाठी पूरक हवामान आहे. मराठवाडा, मध्य महाराष्ट्र व कोकणातील काही भागांमध्ये पावसाचा जोर अधिक राहण्याची शक्यता आहे.