राज्यातील कमाल तापमान ३९ अंशांवर पोहोचले असून, पुढील काही दिवस उन्हाचा ताप वाढण्याची शक्यता हवामानशास्त्र विभागाने वर्तवली आहे. मालेगावमध्ये ४० अंश, अकोला ३९.५ अंश, तर सोलापूर आणि जळगावमध्ये ३९.४ अंश सेल्सियस तापमानाची नोंद झाली आहे. कोकण, मराठवाडा आणि विदर्भातील काही जिल्ह्यांसाठी उष्णतेच्या लाटेचा येलो अलर्ट जारी करण्यात आला आहे. राज्यातील वाढत्या उष्णतेमुळे दुपारी उकाडा जाणवत असून, रात्रीही उष्णता कायम आहे. पुढील काही दिवस तापमान वाढीचा अंदाज असल्याने शेतकऱ्यांनी पिके आणि पशुधनाची विशेष काळजी घ्यावी, असा सल्ला कृषी हवामान केंद्रांनी दिला आहे.