राज्य सरकारने अखेर हरभरा खरेदी जाहीर केली असून, नोंदणी आजपासून सुरू झाली आहे. प्रत्यक्ष खरेदी १ एप्रिलपासून सुरू होईल, असे पणन विभागाने सांगितले. सध्या बाजारभाव हमीभावापेक्षा ६०० ते ७०० रुपयांनी कमी असल्याने शेतकऱ्यांसाठी हमीभावाने विक्रीचा पर्याय उपलब्ध झाला आहे. मागील महिनाभरापासून हरभऱ्याचे दर हमीभावाच्या खाली गेले आहेत. पिवळा वाटाणा आयात वाढवल्यामुळे हरभऱ्याची मागणी घटली आणि त्याचा परिणाम दरावर झाला. सरकारने यंदा हरभऱ्याचा हमीभाव ५,६५० रुपये प्रतिक्विंटल जाहीर केला आहे, पण सध्या बाजारात तो ४,९०० ते ५,००० रुपयांना मिळत आहे. मध्य प्रदेश आणि कर्नाटकात खरेदी लवकर सुरू झाली होती, पण महाराष्ट्रात परवानगी मिळाली नव्हती. त्यामुळे शेतकरी प्रतीक्षेत होते. अखेर सरकारने खरेदीला मंजुरी दिल्याने शेतकऱ्यांना दिलासा मिळणार आहे. बाजारातील आवक वाढल्याने दरावर दबाव आला आहे. अभ्यासकांनी शेतकऱ्यांना हमीभावानेच हरभरा विकण्याचा सल्ला दिला आहे.