गंगापूर, जि. औरंगाबाद : पांरपरिक व्यवस्थेतून बाहेर पडत गंगापूर कृषी उत्पन्न बाजार समिती (Gangapur APMC) पन्नास वर्षांनंतर डिजिटल झाली आहे. बाजार समितीने शेतकऱ्यांना शेतमालाचे भाव (Agriculture Produce Rate) समजण्याचा मार्ग सुकर करण्यासाठी मोबाईल ॲप (Gangapur APMC Mobile App) विकसित केले आहे. तसे करणारी बहुधा जिल्ह्यातील पहिलीच बाजार समिती असावी. मुख्य प्रशासक ऋषिकेश पाटील यांनी यासाठी पुढाकार घेतला असून, संपूर्ण व्यवहारच संगणकीकृत झाला आहे.

गंगापूर बाजार समितीच्या कार्यक्षेत्रात तालुक्यातील १८३ गावांचा समावेश आहे. १० हजारांवर शेतकऱ्यांनी बाजार समितीचे ॲप मोबाईलमध्ये घेतले आहे. या ॲपमुळे संगणकीकरणामध्ये प्रत्येक वाहनांमधील शेतीमालाची प्रवेशद्वारावर संगणकीकृत नोंद होत आहे. खुल्या पद्धतीचा लिलाव होऊन प्रत्येक शेतीमालाचे डाग कोणत्या अडत्याच्या गाळ्यावर आले आहेत, याची नोंद होऊन त्याचा संदेश मोबाईलवर पाठविण्यात येत आहे.

तसेच शेतीमालाची विक्री झाल्यावर जावक गेटवरच त्याची नोंद होऊन, बाजारशुल्क (सेस) ग्राहकांकडून प्रवेशशुल्कांची आकारणी केली जात आहे. यामुळे वर्षाच्‍या शेवटी होणारी बाजार शुल्काची रक्कम दररोज बाजार समितीला मिळत आहे. तसेच प्रत्येक शेतीमालाचे दर तासाला किती दराने विक्री होत आहे. याचे दर बाजार समितीच्या वेबसाइटवर लाइव्ह दिसत आहेत. यामुळे राज्य आणि देशपातळीवर शेतकऱ्यांना शेअर बाजाराप्रमाणे प्रत्येक शेतीमालाच्या दरातील चढ-उतार कळत आहेत. याचा फायदा शेतकरी, अडते, खरेदीदार, व्यापारी आणि बाजार समितीला होत आहे.